स्वनिगलय् मेगु छवाः निषेधाज्ञा

येँ – स्वनिगलय् कारोना संक्रमण म्हो मजूनि धासें स्थानीय प्रशासनं मेगु छवाः निषेधाज्ञा थपे याइगु जूगु दु । स्वनिगःया स्वंगुलिं जिल्लाया प्रमुख जिल्ला अधिकारीपिनि बैठकं उगु निर्णय यायेत्यंगु खः ।

स्थानीय प्रशासनं तयातःगु निषेधाज्ञा थ्वहे वइगु जेठ १३ गते क्वचायेत्यंगु दुसा थौं च्वनीगु स्वंगू जिल्ला प्रशासन प्रमुखतय् मुँज्यां मेगु छवाः निषेधाज्ञा थप यायेगु निर्णय यायेत्यंगु खँ धाःगु दु ।

संक्रमितया ल्याः म्हो मजूगुलिं निषेधाज्ञा थप यायेमाःगु खँ जिल्ला प्रशासन कार्यालय ख्वपया प्रमुख जिल्ला अधिकारी प्रेमप्रसाद भट्टराईनं कनादीगु दु ।

स्वनिगःया तरकारी होलसेल पसलय् आपालं हुलमुल जूगुलिं आः तरकारी बजाःयात नं कडा यायेगु तयारी जुयाच्वंगु खँ धाःगु दु । सुथंनिसें हे मनूत हुलमुल जुइक बजाः वयाच्वंगुलिं आः तरकारी बजाः, बैंक व वित्तीय संस्थायात नं कडा यायेगु तयारी जुयाच्वंगु दु । माल धाःसा छुं न्हिया लागिं तरकारी बजाः बन्द हे याकेगु तकयाः बिचाः जुयाच्वंगु खँ नं धाःगु दु ।

उकथं हे आः थीथी संस्था व कार्यालयय् नं अनुगमन कडा यायेफइगु खँ धाःगु दु ।