श्रीलंकाराम चैत्य निक्वःखुसी पुनःनिर्माण

येँ- येँ महानगरपाकिाया वडा नं. १५ स्वयम्भूस्थित आनन्दकुटी विहारय् च्वंगु श्रीलंकाराम चैत्य निक्वःखुसी पुनःनिर्माण याःगु दु । २०७२ बैशाख १२ गते गोरखाया बारपाक केन्द्र विन्दु जुयाः वःगु भुखाचं क्षति जूगु उगु चैत्य निक्वःखुसी पुनःनिर्माणया ज्या शुरु याःगु खः । भुखाचं क्षतिग्रस्त विहार परिसरय् च्वंगु उगु चैत्य पुनःनिर्माणया निंतिं पुरातत्व विभागं प्राविधिक ग्वाहालि याःगु खः ।

तर पुनःनिर्माणया क्रमय् चैत्यया आकृति स्यंगु व सम्पदाया वास्तुकलाय् नं त्रुटि जुयाः पुलांगु स्वरुप कायम मजूगु धासें निक्वःखुसी पुनःनिर्माणया ज्या न्ह्याकूगु खः ।विश्व सम्पदाया धलखय् दुथ्यानाच्वंगु स्वयम्भू लागाया आनन्दकुटी विहार न्हापा हे जीर्ण अवस्थाय् थ्यनेधुंकूगु खःसा भुखाचं क्षति यायेवं श्रीलंका सरकारया आर्थिक ग्वाहालिइ हालय् जक पुनःनिर्माण सम्पन्न जूगु खः ।

श्रीलंका सरकारया २० गू करोड लागतय् विहार पुनःनिर्माण यायेगु ज्या जूगु खः ।सन् १९४६ य् विहार निर्माण जूगु खःसा परिसरय् च्वंगु श्रीलंकाराम चैतय पुनःनिर्माणया झ्वलय् चैत्यया गोलाद्र्धय् दइगु त्रयोदश भुवनय् प्राविधिक समस्या खने दयेवं उकियात स्यंकाः पुलांगु हे संरचनाकथं निक्वःखुसी पुनःनिर्माण यायेत्यंगु खः ।

थुगु विहारय् स्वांयाःपुन्हिकुन्हु दँय्दसं सुथंनिसें न्हिछियंकं तःजिक हिदान, बुद्धया पवित्र अस्थिधातुया ब्वज्या, धर्मदेशना, बौद्धसभा, खीर भोजन याकेगु लगायतया ज्याझ्वः यायेगु याना वयाच्वंगु दुसा निक्वःखुसी पुनःनिर्माण यायेत्यंगु चैत्यया गर्भय् श्रीलंका सरकारपाखें प्राप्त बुद्धया पवित्र अस्थिधातु तयेगु यानातःगु दु ।