चर्यागुरु पद्मराज वज्राचार्ययात सम्मान

यल – अन्तर्राष्ट्रिय नृत्य दिवसया अवसर लाकाः यलय् चर्या गुरु पद्मराज बज्राचार्य (माहिला गुरुजु) सम्मानित जूगु दु ।
अन्तर्राष्ट्रिय नृत्य दिवस अप्रिल २९ या लसता लाकाः नृत्य निर्देशक संघ नेपाल, यल कचां यलया केशव नारायण चुकय् छगू ज्याझ्वःया यासेंं चर्या गुरु बज्राचार्ययात हंगु खः ।

प्रदेश ३या सभासद् कृष्णलाल महर्जनं दोसल्लां न्ययेकाः हनापौ लःल्हानाः हनादीगु खः । थ्व झ्वलय् संघया केन्द्रीय न्वकू संजय शर्मा राजोपाध्यायं ह्याउँसिन्हः तिकाः, केन्द्रीय नायः भुवनदास श्रेष्ठं स्वांमाः क्वखायेकाः, यल कचा नायः स्वजन रघुवंशीं बेतालिं चिकाः सम्मान यानादीगु खः । सम्मानित बज्राचार्यं थुगु सम्मानं थःत तःधंगु हःपाः बिउगु खँ धयादिल ।

सभासद् महर्जनं आः नेपालय् नं अन्तर्राष्ट्रिय नृत्य दिवसयात तःजिक हनेगु याःगुलिइ लसता प्वंकुसें थज्याःगु ज्याझ्वलं देशय् सुलाच्वंपिं प्रतिभा पिब्वयेत दबू चूलाःगु खँ तयादिल । कला व कलाकारिता क्षेत्रया विकासया लागिं थम्हं फुगु ग्वाहालि यायेगु प्रतिवद्धता नं महर्जनं प्वंकादिल ।

संघया केन्द्रीय न्वकू संजय शर्मा राजोपाध्यायं नृत्ययात पाठ्यक्रमय् हे दुथ्याकाः शैक्षिक स्तरं हे थुकिया बिकास याना यंकेमाःगु बिचाः तयादिल ।

सभासद् महर्जनं त्वाःदेवाय् मत च्याकाः उलेज्या यानादीगु ज्याझ्वलय् कचाया छ्यान्जे अनुप शाक्यं लसकुस यासें कचापाखें न्हापा जूगु ज्याझ्वःया जानकारी बीगु लिसें वइगु जेठया निगूगु वालय् कचा नायः स्वजन रघुबंशीया याकः सनिल व जेठया लिपांगु वालय् नेवाः ताल पद्धतिया कार्यशाला यायेगु योजना दुगु खँ कनादिल ।ज्याझ्वलय् हिपहप, जुम्बालिसेंया पाश्चात्य हुलाप्याखं,ं चर्या, कत्थक, कौडा, झ्याउरे हुलाप्याखंत नं न्ह्यब्वःगु खः ।

सम्बन्धित बुखँ

LEAVE YOUR COMMENTS