विश्व सांस्कृतिक उत्सव–२०२३ नेपाःया ज्वःमदुगु प्रस्तुति

येँ(नेपालभाषा टाइम्स)- अमेरिकाया राजधानी वाशिंगटन डिसीइ तसकं उत्साहजनक रुपय् जूगु ‘विश्व सांस्कृतिक उत्सव–२०२३’ क्वचाःगु दु । सेप्टेम्बर २९ निसें अक्टोबर १ तक स्वन्हुयंकं जूगु उत्सवय् विश्वया १८० गू राष्ट्रं प्रतिनिधित्व यासे थःथःगु देय्या मौलिक व विविधतां जाःगु सांस्कृतिक प्रस्तुति न्ह्यब्वःगु खः ।

ज्याझ्वलय् नेपाःपाखें थीथी जातजातिया ज्वःमदुगु हुलाप्यखंया प्रस्तुति बिउगु खः । सेप्टेम्बर २९ निसें न्ह्याःगु उत्सवय् नेपाःया प्रस्तुति न्ह्यब्वयेगु पाः धाःसा लिपांगु दिं अक्टोबर १ कुन्हु लाःगु खः । ज्याझ्वलय् नेपालं तसकं भव्य व उत्साहजनक रुपं थःगु सहभागिता प्वंकेगु झ्वलय् थीथी जात जातिया हुलाप्याखं न्ह्यब्वःगु खः । नेपाःया पाःकथं उत्सवया लिपांगु दिं अक्टोबर १ तारिखकुन्हु स्थानीय ईकथं सुथसिया १० ताः इलंनिसें शुरु जूगु ज्याझ्वलय् १६५ म्ह कलाकारं थीथी जात जातिया परम्परागत व सांस्कृतिभ भेषभुषाय् हुलाप्याखं न्ह्यब्वःगु खः।

नेपालं ८ गू मिनेटया दुने न्ह्यब्वःगु मंकाः प्याखनं स्वकुमि सकसिगुं नुगः सालेत सफल जूगु खः । नेपालं न्ह्यब्वःगु हुलाप्यानय् १३ निसें ६० दँ तकया कलाकारं प्रस्तुति बिउगु खः । थुकी विद्यार्थीनिसें शिक्षक, उद्यमी, आइटी, फुड एण्ड ड्रग प्रशासन, वरिष्ठ वैज्ञानिकलिसें थीथी पृष्ठभूमियापिंसं कलाकारया रुपय् सहभागिता प्वंकूगु खः ।

विश्वन्यंकंया थीथी संस्कृति कुबियाच्वंगु देय्यात छगू हे थासय् हयाः छमाः स्वांमाय् हनेगु कुतःकथं थुगु ज्याझ्वः परिकल्पना ‘आर्ट अफ लिभि·’या संस्थापक लिसें आध्यात्मिक गुरु श्री रविशंकरं यानादीगु खः । नेपालं थःगु प्रस्तुति बी स्वयां न्ह्यः नांजाःम्ह उद्योगपतिलिसें सांसद विनोद चौधरीं नुगःखँ तयादीगु खः । वयां लिपा कलाकारतय्सं मंकाःकथं नेपाःया म्हसीका बीकथंया थीथी जातजाति, भेषभूषषाय् पुचः पुचः मुनाः हुलाप्याखं न्ह्यब्वःगु खः। नेपाःया प्रस्तुति लिपा थीथी देशं वःपिं विशिष्ट पाहां, पाहां व स्वकुमिपिंसं मुक्तकण्ठं नेपाःया प्रस्तुतियात कयाः च्वछाःगु खः ।

नेपालं न्ह्यब्वःगु थीथी हुलाप्याखनय् १६५ म्ह कलाकारं ८ गू मिनेटया दुने कुमारिप्याखं, लाखेप्याखं, अष्टमातृका प्याखंलिसें नेवाः, गुरुङ, शेर्पा, तामाङ, थारु, झाक्री लगायतया प्याखं न्ह्यब्वःगु खः । नेपालं न्ह्यब्वःगु प्याखंया संयोजनलिसें कलाकारतय्त तालिम बीगु ज्या अमेरिकाय् च्वँच्वनादीम्ह नांजाम्ह नृत्य निर्देशकलिसें चर्या गुरु यज्ञमान शाक्यं यानादीगु खः । नृत्य निर्देशकलिसें चर्या गुरु शाक्यं उत्सवय् ८ मिनेटया हुलाप्याखं न्ह्यब्वयेगु निंतिं वंगु न्याला न्ह्यवंनिसें चान्हि मधासे खटे जुयाः १६५ म्ह कलाकारयात प्रशिक्षण बिया वयाच्वनादीगु खः । चर्या गुरु शाक्यं ८ गू मिनेट दुने नेपाःया दक्वं जातजातिया हुलाप्याखंयात अद्वितीय रुपं न्ह्यब्वयाः विश्वय् नेपाःयात म्हसीकेत सफल जुयादीगु दु ।

नेपाःपाखें उत्सवय् थःगु प्रस्तुति न्ह्यब्वयेगु निंतिं माःकथंया सकतां व्यवस्था मिले यायेगु भाला नेपाल शिक्षा तथा सांस्कृतिक केन्द्र (एनइसीसी) मेरिल्याण्डया नायःलिसें नेपाः पासा पुचः अमेरिकाय् (एनपीपीए)या पुलांम्ह नायः सरोजदेवी प्रजापतिं कयादीगु खः । वय्कःया हे नेतृत्व व चर्या गुरु शाक्यया अथक कुत, समन्वय व मेहनतं ऐतिहासिक ज्याझ्वलय् नेपालं थःगु सफल प्रस्तुति बीत ताःलाःगु खः । प्रजापतिं ज्याझ्वलय् नेपाःया प्रस्तुति व स्वकुमिपिंसं बियादीगु प्रतिक्रियायात लसता प्वंकादिसें थःगु जीवनया हे असाधारण दिं जूगु धयादीगु दु । लिसें वय्कलं नेपाःया प्रस्तुतिया निंतिं प्रत्यक्ष व अप्रत्यक्ष रुपं ग्वाहालि यानादीपिं सकसितं सुभाय् नं देछानादीगु खः ।

थुकथं हे उत्सवय् नेपाःया नं सहभागिता दयेमाःगु महसुस यासें नेपाःयात सहभागित याकेया निंतिं नेपाःया सांस्कृतिक पुचःया निंतिं आवश्यक प्रायोजनया व्यवस्था राजेशबहादुर प्रधान व निभा माथेमा प्रधनं यानादीगु खः । दया फाउण्डेसनय् आवद्ध प्रधानद्वय आर्ट अफ लिभिङया नं सक्रिय आजीवन दुजः खः ।

स्वन्हुतक न्ह्याःगु विश्व सांस्कृतिक उत्सव–२०२३ य् विश्वया १८० गू देय्या १७,००० स्वयां अप्वः कलाकारं ६१ गू स्वयां अप्वः हुलाप्याखंया प्रस्तुति बिउगु खः । विश्वया कुंकुलामं थीथी देय्या राष्ट्र प्रमुख, लब्ध प्रतिष्ठित, गन्यमान्य, उद्योगपति, व्यवसायी, अध्यात्मिक नेता, सर्वसाधारण यानाः न्यागू लख स्वयां अप्वःया सहभागिता दुगु खः ।
वाशिंगटन डिसीइ जूगु थ्व प्यंगूगु संस्करणा विश्व सांस्कृतिक उत्सव खः । थ्व स्वयां न्ह्यः सन् २००६ लय् न्हापांगु संस्करण भारतया बैंगलोरय्, सन् २०११ य् निगूगु संस्करणया उत्सव जर्मनीया राजधानी बर्लिन व सन् २०१६ य् भारतया राजधानी न्हू दिल्लीइ जूगु खः ।

सम्बन्धित बुखँ

LEAVE YOUR COMMENTS