स्वास्थ्य संकटकाल बारे नं बिचाः
येँ – कोरोना महामारी भयावह जुजुं वनाच्वंगु कारणं उकियात पनेगु लागिं देशय् स्वास्थ्य संकटकाल घोषणा यायेगु बारे समेत सरकारं बिचाः यानाच्वंगु खँ पिहां वःगु दु । तर आः थथें संकटकाल लागू यायेगु खँय् धाःसा छुं निर्णय जूगु मदुनि ।
कोरोना महामारी नियन्त्रणया विषयय् सहलह यायेत म्हिगः च्वंगु कोराना संकट व्यवस्था समिति (सीसीएमसी) या मुँज्यां याःगु निर्णय बारे पत्रकारतलिसे खँ ल्हासें परराष्ट्र मन्त्री प्रदिप ज्ञवालं थ्व खँ कनादीगु खः । महामारी पनेगु लागिं स्वास्थ्य संकटकाल हे लागू याये माली लाकि धकाः नं सरकारं बिचाः यानाच्वंगु खःसां आः थथें थ्व विकल्पय् वनेगु छुं तयारी धाःसा मदुगु जानकारी वय्कलं बियादीगु खः ।
अथे खःसां कोरोना नियन्त्रणया लागिं देशय् विद्यमान पुलांगु कानून पर्याप्त मजूगु कारणं अज्याःगु कानुनी झंझट चीकेगु निर्णय धाःसा सीसीएमसीं याःगु दु । पुलांगु कानूनया कारणं सामान झिके यायेगु, न्हूगु निर्माण यायेगु, वासः न्याना कायेगु आदि थेंज्याःगु ज्याखँ यायेत मछिनाच्वंगु कारणं अज्याःगु कानून संशोधन यायेत कानून मन्त्रालययात निर्देशन बीगु निर्णय नं मुँज्यां याःगु दु ।
प्रधानमन्त्री केपी ओलीया अध्यक्षताय् उगु बैठक च्वंगु खः । परराष्ट्र मन्त्री ज्ञवालीं बियादीगु जानकारी कथं प्रम ओलीं आः थःपिनिगु सम्पूर्ण ध्यान हे कोरोना महामारी नियन्त्रणय् लगे यायेगु धकाः सकलें मन्त्रीतय्त नं निर्देशन बियादीगु दु । थुकिया लागिं यायेमाःगु फुक्क ज्या न्ह्याकेत नं वय्कलं निर्देशन बियादीगु खः ।
विरामी व सीपिं म्हो जुजुं वन
कोरोना ल्वचं कयाः सीपिं व संक्रमण जुइपिं मनूतय् ल्याः बुलुहुुँ म्हो जुजुं वंगु दु । म्हिगः पित बिउगु जानकारी कथं वंगु २४ घौया दुने देय्न्यंकं कोरोनां कयाः सीपिं मनूतय् ल्याः १४५ थ्यंगु दु । वंगु छुं न्हि थ्व ल्याः १५० स्वयां अप्वः थ्यनाच्वंगु खः । अथे हे कोरोना संक्रमित जूपिनि ल्याः ७,३६८ म्ह थपे जूगु दु । मुक्कं १९,५३९ म्हेसिया परीक्षण जूगुली थुलि पोजिटिभ पिहां वःगु खः ।
थ्व मुक्कं ल्याखय् स्वनिगलय् २६०९ संक्रमित थपे जूगु दु । उकी येँय् १८८१, यलय् ४३६ व ख्वपय् २९२ म्ह थपे जूगु दु । थ्व ल्याः कथं येँय् नं कोरोना संक्रमित थपे जुइगु ल्याः म्हो जुजुं वंगु दु । येँ महानगरपालिका दुने जक कोरोना संक्रमित जूपिं मनूतय् ल्याः ५० हजार स्वयां अप्वः थ्यंगु दु । अथे हे थौंकन्हय् सक्रिय संक्रमिततय् ल्याः १० हजार स्वयां अप्वः थ्यंगु दु ।
LEAVE YOUR COMMENTS