येँ – लकडाउनया दथुइ नं येँ महानगरपालिकां विकास निर्माण व पूर्वाधारया ज्यायात न्ह्याकाच्वंगु दु । येँ महानगरपालिकाया शहरी पूर्वाधार विभागया प्रमुख राम थापां लकडाउनया इलय् नं भौतिक पूर्वाधारया ज्या न्ह्यानाच्वंगु खँ धयादीगु दु ।
‘छुं न्हि न्ह्यव जक वडा नं. ८ य् लाःगु जयबागेश्वरीइ सरे याये मिले जूगु आकाशे ताँया शिलान्यास जुल’ वय्कलं कनादील, ‘ अथेहे माइतीघर लिक्कसं स्वास्थ्य तथा जनसंख्या मन्त्रालयया लिक्कसं लाःगु आकाशे तां दयेके क्वचायेत्यंगु दु । आः असार मसान्त तकया दुने दयेके क्वचायेकेगु तयारी दु ।’
वय्कलं जयबागेश्वरीया ताँ लकडाउनया इलय् नं दयेके ज्या न्ह्याकेगु व मोहनि तकया दुने दयेके क्वचायेकेगु लक्ष्य दुगु खँ नं कनादीगु दु । वय्कलं आर्थि दँ चालु आर्थिक दँया दुने खुथाय् सरे याये मिले जूगु ताँ दयेकेगु योजना कथं चाबही, जयबागेश्वरी व माइतीघरय् दयेके ज्या न्ह्याकागु खँ कनादीगु दु ।
‘थ्व हे दँय् न्हू वानेश्वर व कोटेश्वरय् नं थज्याःगु हे ताँ दयेकेगु क्वःछिनागु खःसां थन सडक विभागंहे ताँ दयेकेगु धाःगुलिं आः मेगु हे थाय् ल्ययेगु ज्या जूगु दु’ वय्कलं धयादीगु दु । वय्कलं महानगरपालिकां झिथाय् थज्याःगु ताँ दयेकेगु योजना दयेकातःगु खँ नं धयादीगु दु ।
अथेहे लकडाउनया इलय् वडा नं. ७, १०, ११, १२, १३, १४ व १६ य् थीथी लँय् पिच यायेगु, ब्लक छापे यायेगु बाहेक ढलान यायेगु, ढः दयेकेगु, वडा भवन दयेकेगु ज्या जुयाच्वंगु जानकारी नं वय्कलं बियादीगु दु । पिच यायेगु निंतिं श्रमिकत तराईपाखें वयेमाःगु जूगुलि. थ्व ज्या धाःसा न्ह्याकेमफुगु खँ नं वय्कलं धयादीगु दु ।
थ्वहे दथुइ येँ महानगरपालिकां जीवन निर्वाहया निंतिं पारिश्रमिक कार्यविधि २०७७ नं जारी याःगु दु । लकडाउनया अवस्था ताःहाकः जुयावन धाःसा श्रमया आधारय् पारिश्रमिक व्यवस्था यायेत कार्यविधि हे जारी यानाः महानगरपालिकां अज्याःपिं श्रमिकतय्त सार्वजनिक पूर्वाधार विकास, सार्वजनिक पूर्वाधार मर्मत सम्हार, धः दयेकेगु, फुटपाथ व्यवस्थापन यायेगु, सम्पदा संरक्षण व सौन्दर्यकरण, फोहरमैला व्यवस्थापनया ज्याय् लगे यायेगु तयारी यानाच्वंगु खँ नं वय्कलं धयादीगु दु ।
LEAVE YOUR COMMENTS