एमालेया मेपिं निम्ह घटे जुइगु जुल

येँ – एमाले त्वःताः नेकपा (एकीकृत समाजवादी) पार्टीइ वने चाहे जूपिं सांसदतय्त भदौ २९ गते तक छुं नं कथंया कारवाही मयायेगु लागिं सर्वोच्च अदालतं निर्देशन जारी याःगु दु । माधव नेपालया नेतृत्वय् एकीकृत समाजवादी पार्टी दर्ता याःबलय् सनाखतया धलखय् नां छुट जूपिं सांसदपिं सोमप्रसाद पाण्डे व शारदा भट्टं लिपा वनाः सनाखत याःबलय् निर्वाचन आयोगं उकियात मान्यता मबीगु खँ धाःगु खः ।

वयां लिपा पाण्डे व भट्ट निम्हेस्यां सर्वोच्चय् उकिया विरुद्ध रिट दायर याना बिउगु खः । उकी म्हिगः जूगु सुनुवाई लिपा न्यायाधीश मीरा खड्काया एकल इजलासं एमाले त्वःताः एकीकृत समाजवादी पार्टीइ वने चाहे जूपिं सांसदतय्त मपनेगु लागिं निर्वाचन आयोगयात निर्देशन बिउगु खः । थ्व ल्याखं आः कन्हय् भदौ २९ गते तक एमालेया सुं नं सांसद एकीकृत समाजवादीइ वने चाहे जुल धाःसा उपिं वने दइगु जूगु दु । न्हापा नां छुटे जूगु खःसां लिपा हानं सनाखत याये फइगु खँ नं सर्वोच्चं धाःगु दु ।

सर्वोच्चया थ्व आदेश लिपा आः एमालेया मेपिं निम्ह सांसदत नं घटे जुयाः माधव नेपालया पार्टीइ वनीगु जूगु दु ।

सम्बन्धित बुखँ

LEAVE YOUR COMMENTS