किपुली डुंगा

किपू – तःदँ तक चा द्वँ चिनाः अथें वांछ्वया तःगु थनया पुखुली आः लः जायेकाः डुंगा समेत चले याइगु जूगु दु । म्हिगः पर्यटन दिवसया लसताय् जूगु विशेष ज्याझ्वलय् ३ नम्बर प्रदेशया भौतिक पूर्वाधार मन्त्री केशव स्थापितं उकिया उलेज्या यानादीगु खः । किपू नपा वडा नं. ३ या खासी लागाय् स्वंगू ऐतिहासिक पुखू दु ।

उपिं छसिकथं लाबा पुखू, भिं पुखू व मभिं पुखू । वंगु २० दँ न्ह्यवंनिसें अथें चा मुनाः मैदान थें जुइधुंकूगु थ्व पुखूयात नगरपालिकाय् न्हूपिं जनप्रतिनिधित वयेधुंकाः हाकनं चा लिकयाः पुखुली लः जायेकेगु ज्या जूगु खः । म्हिगः थ्व स्वंगू पुखू मध्ये दथुइ च्वंगु भिं पुखुली डुंगा चले याःगु खः । उकी मन्त्री स्थापित लिसें किपू नपाया मेयर रमेश महर्जनपिं च्वनाः चाःहिलादिल ।

३ वडाया अध्यक्ष राजेन्द्र महर्जनं आः थ्व पुखुली थनिंनिसें नियमित रुपं हे डुंगा चले यायेगु खँ ‘नेपालभाषा टाइम्स’ यात कनादिल । डुंगाय् च्वनेगु लागिं म्हतिं २५ तकाया टिकट कायेमाः । विद्यार्थीयात १५ तका व ज्येष्ठ नागरिकयात निःशुल्क जुइगु खँ नं वय्कलं कनादिल ।

थन चले यायेगु लागिं पोखराया फेवा तालय् चले याइगु छगः डुंगा ७५ द्वः तका पुलाः न्याना हःगु खः । यदि बांलाना वन धाःसा डुंगा थपे यायेगु खँ नं वय्कलं कनादिल ।थ्व ज्यापाखें किपुली आन्तरिक पर्यटनया विकास जुइगु खँ मेयर रमेश महर्जनं कनादिल ।