कुहां वल स्थानीय समुदाय

येँ – कोरोना महामारीया इलय् विरामी भर्ना यायेत अस्पतालय् बेड तकं काये थाकुयाच्वंगु खँयात ध्यानय् तयाः स्वनिगःया स्थानीय समुदाय थःपिं हे अक्सिजन सहितया आइसोलेशन सेन्टर चायेकेगु ज्याय् कुहां वःगु दु । थ्व झ्वलय् येँ व यलया स्थानीय जनतां अज्याःगु सेन्टर चायेकेगु शुरु याना हःगु खः ।

यलया च्यासः त्वालय् च्वंगु स्थानीय क्लबतय्सं थःगु हे लागाय् छगू चीधंगु आइसोलेशन सेन्टर चायेकाः सञ्चालन यायेधुंकूगु दु । अनया च्यासः मंकाः खलः, च्यासल युवा क्लब आदि स्थानीय संस्थात जानाः उगु आइसोलेशन सेन्टर चायेकूगु खः । अन हे च्वंगु छगू गुथिया छेँय् अक्सिजन सहितया बेड तयाः विरामीयात सेवा बीगु शुरु याःगु खः । थुकिया लागिं अन स्थानीय लागाय् च्वंपिं डाक्टर व नर्सत परिचालन याःगु दु ।

अथे हे येँय् नं नेवाः ग्वाहालि पुचःया नेवाः कार्यकर्तात जानाः चीधंगु आइसोलेशन सेन्टर चायेकेगु तयारी याःगु दु । नेवाः ग्वाहालि पुचःया कामपा वडा नं. १७ व वडा नं. २६ या कार्यकर्तात जानाः ग्वंगःबुँया छगू डायलासिस केन्द्रय् थ्व आइसोलेसशन सेन्टर चायेकूगु खः । २० बेड जक दुगु उगु सेन्टरय् अक्सिजन समेत दुगु जुयाः थुकिया सञ्चालन लिपा स्थानीय मनूतय्त अःपुइगु खँ धाःगु दु ।

थज्याःगु आइसोलेशन सेन्टरय् तच्वःपिं विरामी तइगु मखुसें छेँय् अलग्ग च्वनेगु व्यवस्था मदुपिं व खास यानाः अक्सिजन थनेमाःपिं विरामीतय्त तयेगु खँ धाःगु दु । कोरोनाया महामारी स्थानीय समुदायस्तरय् हे दुहां वनेधुंकूगु जुयाः थुकियात पनेगु लागिं स्थानीय समुदायं समेत पहल यायेमाःगु खँयात महसुस यासें आः त्वाःत्वालय् हे चिचीधंगु आइसोलेशन सेन्टर चायेकेमाःगु बिचाः तया हःगु दु ।

थ्वहे झ्वलय् येँया मारवाडी समुदायया ल्याय्म्हतय्सं नं अक्सिजन अभावया इलय् थःगु सक्रियता क्यना हःगु दु । मारवाडी युवा मञ्चपाखें सुयां छेँय् अक्सिजनया सिलिण्डर अथें लानाच्वंगु दुसा छुं ईया लागिं प्रयोग यायेत बियादिसँ धकाः छेँय् छेँय् हे काः वयाच्वंगु दु । बजारय् अक्सिजन दुसां सिलिण्डरया अभाव जुयाच्वन धइगु खँ वःगुलिं मारवाडी समुदायं थ्व अभियान न्ह्याकूगु खः ।

थ्वहे झ्वलय् नेपाल सरकारं राजधानी येँय् कारोना विरामीया लागिं द्वःछिगू बेड थपे यायेगु धकाः याःगु घोषणा कथं तीव्र रुपं ज्या न्ह्याकूगु दु । येँ महानगरपालिकां द्वःछिगू बेड थपे यायेगु लागिं येँय् च्वंगु थीथी अस्पताललिसे समन्वय यानाः ज्या न्ह्याकूगु दु । थ्व ज्या सरकारं नेपाली सेनायात जिम्मा बिउगु खः ।

सम्बन्धित बुखँ

LEAVE YOUR COMMENTS