ससफो १२ व २० वडाया न्हापांगु अधिवेशन
येँ- संघीय समाजवादी फोरम (ससफो) नेपाल येँ महानगरपालिका वडा नं. १२ व २० कमिटीया न्हापांगु अधिवेशन जुल । वडा नं. १२ या अधिवेशन येँ जिल्लाया दुजः बाबुराजा महर्जनया सभापतित्वय् जूगु खःसा मूपाहांकथं पार्टी केन्द्रीय सल्लाहकार समितिया प्रमुख डा. महेशमान श्रेष्ठ झायादीगु खः ।
ज्याझ्वलय् नवासें मूपाहां श्रेष्ठं नेकपा व कांग्रेसया नेतातय्सं नेपाःयात भ्रष्टीकरण याःगु द्वपं बियादिल । लिसें वय्कलं देय्यात सही लँपुइ न्ह्यःने यंकेगु निंतिं सही विचाः ज्वनाः न्ह्याः वनाच्वंगु पार्टी ससफो जक खः धयादिल ।
पार्टी ३ नं. प्रदेशया अध्यक्ष लालबहादुर तामांगं त्वाः त्वालय् संगठन विस्तार याना वनेमाःगु खँय् बः बियादिल । पार्टी केन्द्रीय दुजःनापं महानगर इन्चार्ज पवित्र वज्राचार्यं महानगरपालिकाया गतिविधिइ चिउताः तयेमाःगु आवश्यक जूगु धासें जनतायात पीर मर्का जुइगु ज्याया विरोध याना वनेमाःगु खँय् बः बियादिल ।
पार्टीया वैकल्पिक केन्द्रीय दुजः मनरत्न शाक्य, राधाकृष्ण महर्जन, जिल्ला उपसचिव प्रेमराज शिल्पकार, कोषाध्यक्ष ज्ञानराजा सिख्राकार जिल्ला दुजःपिं मंगलरत्न ताम्राकार, केशव महर्जन, शर्मिला डंगोल, सुरज महर्जन लगायपिनिगु उपस्थिति दुगु अधिवेशनं विक्की महर्जनया अध्यक्षताय् झिंछम्हेसिया वडा कमिटी नं गठन याःगु दु ।
कमिटीइ गिता जोशी छ्यांजे, राजु महर्जन कोषाध्यक्षय् च्वनादीगु दुसा दुजलय् मनोज महर्जन, उमेश बलामि, शान्ति महर्जन, सुनिल महर्जन, सृजना महर्जन, श्याम महर्जन, लिलादेवी वज्राचार्य, जयनु जोशी च्वनादीगु दु ।
अथे हे पार्टीया येँ महानगरपालिका २० वडाया न्हापांगु अधिवेशन तदर्थ समितिया नायः कुमार डंगोलया अध्यक्षताय् जुल । ज्याझ्वःया उलेज्या मूपाहां पार्टी सहअध्यक्ष राजेन्द्र श्रेष्ठं यानादीगु खः ।
ज्याझ्वलय् नवासें मूपाहां श्रेष्ठं नेपाः थेंज्याःगु विविधतां जाःगु देशय् सामन्ती व अधिनायकवादीतय् भजन हालाच्वनेगु मखसे संघीय समाजवादया लँपु नाला वने फत धाःसा जक राष्ट्रिय एकतायात ल्यंकेगु नापं समतामूलक समृद्धिया लुखा चायेके फइ धयादिल ।
अधिवेशनय् पार्टी सल्लाहकार समितिया प्रमुख डा. महेशमान श्रेष्ठ, महानगर इन्चार्ज पवित्र वज्राचार्य, जिल्ला अध्यक्ष मनरत्न शाक्य, महानगर अध्यक्ष मंगलरत्न ताम्राकारपिंसं भिंतुना न्वचु बियादीगु खः ।
पार्टीया थीथी तहया पदाधिकारी व दुजःपिनिगु उपस्थिति दुगु अधिवेशनं कुमार डंगोलया हे अध्यक्षताय् ११ म्हेसिया वडा कमिटी नं गठन याःगु खः । वडा कमिटीइ निरोज शाही, चन्दन श्रेष्ठ, कमलहेरा तुलाधर, त्रिरत्न महर्जन छसिकथं न्वकु, छ्यांजे, दांभरिं व लिउ छ्यांजेय् च्वनादीगु दु ।
LEAVE YOUR COMMENTS