मेलम्ची हयेत श्वेतपत्र असारं वइ ला थें !

खानेपानी तथा सरसफाइ मन्त्रालयं असारया दुने स्वनिगलय् मेलम्चीया त्वनेगु लः हयेगुकथं श्वेतपत्र जारी याःगु दु । मन्त्रालयय् छुं दिं न्ह्यः ग्वसाः ग्वःगु ज्याझ्वलय् खानेपानी मन्त्री बिना मगरं ल्यं दुगु ज्या क्वचायेकाः चालु आर्थिक दँया दुने हे स्वनिगलय् लः हयेगुकथं श्वेतपत्र जारी यानादीगु खः ।

वय्कलं दक्वं नागरिकया मौलिक हक जूगु धासें सरकार स्वनिगःवासीयात याकनं मेलम्चीया लः छेँय् छेँय् हयेत प्रतिवद्ध दुगु नं स्पष्ट यानादिल । स्वनिगःवासी आशा व भलसा कयाः मेलम्चीयात ताःईतक हे पियाच्वंगु वय्कःया धापू दु । वय्कलं मन्त्रालयया कार्यतालिकाकथं हे निर्माणया ज्या तीव्र गतिइ जुयाच्वंगु जानकारी बियादिल ।

झिंन्यालाया दुने निर्माण सम्पन्न यायेकथं सरकारं थगुने असोजय् चीनिया निर्माण कम्पनी सिनो हाइड्रोलिसे सम्झौता याःगु खः । सिनो हाइड्रोलिसे असोज १२ य् सुरुङ निर्माणया निंतिं व असोज २४ गते हेडबक्स निर्माणया सम्झौता जूगु खः । ‘चीनिया निर्माण कम्पनी सिनो हाइड्रों द्रुतगतिइ निर्माणया ज्या यानाच्वंगु दु’, वय्कलं धयादिल, ‘तःक्वः तःक्वःया निराशाया सतिक्क जिपिं थ्यनाच्वंगु दु ।

मन्त्रालयया सचिव माधव बेल्वासें मेलम्चीया बारे आम नागरिकयाके दयाच्वंगु भ्रम चिइकेत श्वेतपत्र जारी यानागु जानकारी बियादिल । मेलम्चीया विषयय् बिस्कं बिस्कं धारणा वइगु जूगुलिं छगू हे जक खँया जानकारी याकेत मन्त्रालयं थ्व ज्या न्ह्यःने हःगु वय्कःया धापू दु । वय्कलं निर्माण कम्पनीं याःगु सम्झौता स्वयां न्ह्यः हे ज्या सम्मन्न याइगु जूगुलिं असार मसान्ततकया दुने लः हयेगु जुइ धयादिल ।

सम्झौताकथं सुरुङया ज्या वइगु असोजतकया दुने व हेडबक्सया ज्या पुस तकया दुने सम्पन्न यायेगुकथंया कार्यतालिका दुगु खःसां नं सम्झौता स्वयां न्ह्यः हे उगु ज्या सिधइगु सचिव बेल्वासं कनादिल । सुरुङया ज्या असारय् हे सिमधःसां नं स्वनिगःवासीं व हे इलंनिसें लः त्वने खनी धयादिल । वय्कलं धयादिल, ‘अस्थायी बाँध दयेकाः लः हयेगु तयारी यानागु दु ।’

मेलम्ची खानेपानी विकास समितिया कार्यकारी निर्देशक तिरेशप्रसाद खत्रीयाकथं आतक आयोजनाया भौतिक प्रगति ९५ दशमलव १२ प्रतिशत दुसा वित्तीय प्रगति ८९ दशमलव ७ प्रतिशत दु । आयोजनाया १४ गू ध्वाखामध्ये गुंगू सम्पन्न जुइधुंकूगु दुसा मुख्य सुरुङया अन्तिम चरणया ज्या (फिनिसिंग) ६० प्रतिशत सिधयेधुंकूगु दु ।

थुकथं हे आयोजनाया स्वंगू ‘भेन्ट साफ्टस’ जडान यायेमाःगुलिइ छगू जडान याःगु दु । ‘अडिट सुरुङ’य् अनुगमन उपकरण जडान, प्लानल बोर्ड, सेन्सर, वाल बुसिंग व केवल्सया ज्या यायेगु निंतिं सम्झौता जुइधुंकूगु समितिया कार्यकारी निर्देशक खत्रीं कनादिल । मेलम्चीया त्वनेगु लः स्वनिगलय् वितरण याये न्ह्यः सुन्दरीजलय् प्रशोधन यायेगु ज्या जुइ ।

लः प्रशोधनया निंतिं निगू प्रशोधन केन्द्र निर्माण याःगुलिइ निगुलिं सिधयेधुंकूगु दु । थुकीमध्ये छगू एशियाली विकास बैंक (एडीबी)या आर्थिक ग्वाहालिइ व मेगु जापान अन्तर्राष्ट्रिय सहयोग नियोग (जाइका)या आर्थिक ग्वाहालिइ निर्माण जूगु खः । असार मसान्ततक सुरुङया परीक्षण सिधयेकाः संचालनय् हयेगु प्रमुख खत्रीं जानकारी बियादिल ।

इटालीया निर्माण कम्पनी सीएमसीं ज्या सिमधयेकं हे त्वःताः वनेवं सरकारं न्हूगु ठेक्का सम्झौतापाखें निर्माण प्रक्रिया न्ह्याकूगु खः । आयोजनाया ल्यं दुगु ज्या सिधयेकेगु ल्याखं सम्झौता जूगुलिइ उगु कम्पनीं नियमित रुपय् व पर्याप्त जनशक्ति व उपकरण संचालन यानाः ज्या यानाच्वंगु दु ।

सरकारं फक्व याकनं निर्माण सम्पन्न यानाः स्वनिगःवासीयात लः त्वंकेगु लक्ष्य काःगु दु । कम्पनीयात याकनं ज्या क्वचायेकल धाःसा न्हिं शुन्य दशमलव १५ प्रतिशतया ल्याखं लाभांश बीगु सम्झौताय् न्ह्यथनातःगु दु । आयोजनाया मुक्कं ज्यायात ‘हेडवर्क’, सुरुङमार्ग व प्रशोधन केन्द्र यानाः स्वब्वय् ब्वथलातःगु दु । थुकी हेडवर्क व सुरुङमार्गया ज्या सिनो हाइड्रों यानाच्वंगु खः ।

आयोजनाया मुख्य सुरुङ म्हुइगुज्या सिधःगु दु । निगू प्रशोधन केन्द्र निर्माण सम्पन्न जुइधुंकूगु दु । आयोजनाया निंतिं आवश्यक भौतिक पूर्वाधारया निंतिं झण्डै ७० किलोमिटर सतक मर्मत, सम्भारव स्तरोन्नतिया ज्या सिधयेधुंकूगु दु ।सुरुङय् च्वं कुतुं वयाः थनया संरचनायात क्षति मजुइमा धकाः २७ दशमलव ५ किलोमिटरय् हे प्रारम्भिक ‘सपोर्ट’या ज्या सिधःगु दु ।

झण्डै छगू लाख घनमिटर कमजोर ल्वहं चानाः वांछ्वया उगु थासय् कंक्रिट तयेगु ज्या नं सिधयेधुंकूगु दु । सुरुङनिसें प्रशोधन केन्द्रतक आपूर्ति पाइप जडान जुइधुंकूगु दु । निर्माणया ज्या सम्पन्न जुयाच्वँच्वं काठमाडौं उपत्यका खानेपानी लिमिटेड, आयोजना कार्यान्वयन निर्देशनालयं त्वनेगु लः वितरण व फोहर लः व्यवस्थापनया निंतिं आवश्यक संरचना निर्माण प्रक्रियायात न्ह्याकूगु दु ।

पाइप जडान यायेगु ज्या झण्डै ९५ प्रतिशत सिधःगु दु । स्वनिगःया प्यंगू थासय् फोहर लः प्रशोधन केन्द्र निर्माण न्ह्याःगु दु ।सरकारया राष्ट्रिय गौरवया आयोजना मेलम्ची सम्पन्न जुइवं न्हिं १७ गू करोड लिटर लः स्वनिगलय् वइ ।

स्वनिगलय् दीर्घकालीन रुपय् त्वनेगु लःया आपूर्ति यायेगु निंतिं विश्व बैंकया ग्वाहालिइ सन् १९७२ य् न्हापांखुसीइ अध्ययन यायेगु ज्या न्ह्याःगु खः । मेलम्चीपाखें त्वनेगु लः हयेत न्हापांखुसी २०५३ सालय् मेलम्ची खानेपानी लिमिटेडया स्थापना याःगु खः ।

सम्बन्धित बुखँ

LEAVE YOUR COMMENTS