संसद भंग यानाछ्वयेगु तयारी
येँ -सरकारं वर्तमान प्रतिनिधिसभा भंग यानाः ‘अर्लि इलेक्सन’ पाखे वनेगुबारे बिचाः शुरु याःगु खँ सीदुगु दु । संसद भंग यानाः ‘अर्लि इलेक्सन’ य् वनेमाःगुया सम्पूर्ण दोष धाःसा विपक्षी एमालेया छ्यनय् दिकेगु कुतः यानाच्वंगु नं सीदुगु दु ।
विपक्षी एमालें लगातार संसदय् पंगः थनाच्वंगु कारणं संसद हे न्ह्याके मफुत धइगु खँयात त्वह दयेकाः संसद भंग यायेगुबारे बिचाः शुरु याःगु खः । सत्ता गठबन्धन पार्टी नेकपा (एस) या अध्यक्ष माधव नेपालं ‘एमालें अवरोध याना हे च्वन धाःसा संसद भंग यानाः अर्लि इलेक्सनय् वनेगु हे बेस’ धकाः सार्वजनिक रुपं हे न्ववानादीधुंकूगु दु ।
तर विज्ञ सूत्रतय्सं धाःसा संसद भंग यानाः अर्लि इलेक्सनय् वन धाःसा वैशाख ३० गते यायेगु धकाः घोषणा जुयाच्वंगु स्थानीय चुनाव मजुइगु सम्भावना अप्वइ । सरकारं स्थानीय चुनाव मयाकेगु लागिं हे ‘अर्लि इलेक्सन’ या खँ हयाच्वंगु द्वपं नं लाःगु दु ।
पुलांम्ह सभामुख लिसें एमालेया नेता सुवास नेम्बाङं सरकारं स्थानीय चुनाव छले यायेगु लागिं हे संसद भंग यानाः अर्लि इलेक्सनया खँ हयाच्वंगु द्वपं बियादीगु दु । म्हिगः सञ्चारमाध्यम लिसे खँ ल्हासें नेता नेम्बाङं न्हापा संसद भंग जूबलय् प्रतिगमन जुल धकाः हाला जूपिं दलत आः छाय् थः हे संसद भंग यायेगु लँय् वनाच्वन धकाः न्ह्यसः तसें धयादीगु दु, ‘वय्कःपिं न्ह्याथे यानाः नं स्थानीय चुनाव मयाकेगु पक्षय् दु । उकुन्हु छगू त्वहः दयेकल, आः मेगु त्वहः दयेकाच्वंगु दु ।’
सूत्रतय्सं धाःकथं सत्ता गठबन्धनय् दुथ्याःगु दलतय्सं एमालेया अवरोध चीकेगु खःसा उमित पेले यानाः हे जूसां न्ह्याः वनेगु व अथे नं याये मफुत धाःसा संसद भंग यानाः अर्लि इलेक्सनय् वनेगु धकाः सहमति दयेकूगु दु ।
अथे यायेबलय् स्थानीय निकाय छले जुइगु जूगुलिं न्हापां संसदया चुनाव निं यायेमाः धकाः माओवादी केन्द्र व नेकपा (एस) पाखें छगू मत दयेकाः प्रधानमन्त्रीयात थुइकेगु कुतः यानाच्वंगु खँ नं सूत्रं धाःगु दु । सूत्रया कथं अर्लि इलेक्सनया थ्व बिचाः माओवादी व नेकपा (एसं) हे हःगु खः ।
हानं स्वंगुलिं तह छक्वलं ?
प्रतिनिधिसभा भंग यायेगु प्रस्तावया नापनापं आः हानं स्वंगुलिं तहया चुनाव छक्वलं यायेगु धइगु प्रस्ताव नं न्ह्यःने वःगु दु । प्रतिनिधिसभा भंग जुल धाःसा वयां लिपा प्रतिनिधिसभा, प्रदेश सभा व स्थानीय तह यानाः स्वंगुलिं तहया चुनाव छक्वलं यायेगु धकाः सत्तागठबन्धनं मन्थन शुरु याःगु खँ सीदुगु दु । थ्व स्वयां न्ह्यः नं स्वंगुलिं तहया चुनाव छक्वलं यायेगु धकाः खँ पिहां वःबलय् कानून व्यवसायीतय्सं संविधान व कानून कथं थ्व मिले मजू धकाः सुझाव बिउगु खः । अबलय् सरकार छपलाः लिचिउगु खःसां आः हानं स्वंगुलिं तहया चुनाव छक्वलं यायेगु खँ पित हयाच्वंगु सीदुगु दु ।
LEAVE YOUR COMMENTS