मोति पत्रकारिता सिरपाः लःल्हात

यल – नेवाः प्रेस दबूपाखें लःल्हाना वयाच्वंगु मोति पत्रकारिता सिरपाः पत्रकार कुमार रंजितयात लःल्हाःगु दु । दबूया ग्वसालय् जूगु छगू ज्याझ्वःया दथुइ वंगु स्वंगू दशक न्ह्यवंनिसें पत्रकारिता ख्यलय् सक्रिय जुयाच्वनादीम्ह पत्रकार रंजितयात उगु सिरपाः लःहाःगु खः ।

दबूया नायः नरेन्द्र श्रेष्ठया सभापतित्वय् जूगु ज्याझ्वःया मूपाहां नेकपाया नेतृ पम्फा भुसालं पुरस्कृत व्यक्तित्व रंजितयात दोसल्लां न्ययेकाः हनापौ लःल्हानादीगु ज्याझ्वलय् सिरपाःया दाता मोतिरत्न शिल्पकारं दां लःल्हानादीगु खः ।

ज्याझ्वलय् ईश्वरीमैयाँ श्रेष्ठ व पुष्प चित्रकार, गणेशराम लाछियात नेपालभाषा साहित्य व नेवाः संस्कृतियात च्वन्ह्याकेगु ज्याय् योगदान बियादीगुलिं दोसल्लां न्ययेकाः हने ज्या नं याःगु खः ।

सिरपाःया दाता शिल्पकारं लसकुस यासें न्ह्याःगु ज्याझ्वलय् प्रदेश नं. ३ या सांसद शोभा शाक्य, नेवाः देय् दबूया नायः नरेश ताम्राकार, तीर्थमान शाक्य, नेपालभाषा मंकाः खलःया नायः ऋषिप्रसाद श्रेष्ठ, ईश्वरीमैयाँ श्रेष्ठ व पुरस्कृत व्यक्ति रंजितं थःथःगु नुगःखँ तयादीगु खः ।

ज्याझ्वलय् नवासें देय् दबूया नायः ताम्राकारं सिक्किमय् नेवाः भाय्या विकासया निंतिं सरकारीस्तर गुलि ज्या जुयाच्वंगु खः, उलि नेपालय् न्ह्यागु हे सरकार वःसां नं छुं कुतः मजू धासें सरकारं आदिवासी जनजातितय् मातृभाषाप्रति आस्था तयाः स्वयेगु ज्या यानामच्वंगु खँय् असन्तुष्टि प्वंकादिल ।

ज्याझ्वलय् रामकृष्ण कर्माचार्य, डा. पुष्पराज राजकर्णिकार, राजा शाक्य, जुलुम चित्रकार, सुवर्णकेशरी चित्रकार, जुजुकाजी रंजित लगायत आपालं भाषा ख्यः व सांगीतिक ख्यःया व्यक्तित्वपिनिगु उपस्थिति दुगु खः ।