बेड सुचुकल धाःसा कारवाही

प्रधानमन्त्री केपी ओलीं म्हिगः देशवासीया नामय् संवोधन यासें कोरोना महामारीया वासः याकेगु लागिं येँय् १००० हजार बेडया कोरोना उपचार अस्पताल चायेकेगु जानकारी बियादीगु दु । वय्कलं कोरोना महामारी देशय् तःधंक ब्वलनाच्वंगु खःसां थुकियात कयाः सतर्क जुइमाः तर आतंकित धाःसा मजुइत नं इनाप यानादीगु दु । आः कोरोनाया खोप हयेगु लागिं सरकारं चीन व रुसलिसे नं खँल्हाबल्हा यानाच्वंगु जानकारी नं बियादिल ।

अथे हे कोरोनाया विरामीतय्त वासः यायेगु लागिं छुं नं अस्पतालं बेड सुचुकल धाःसा उमित कडा कारवाही यायेगु ख्याच्वः बिसें देशय् दुने हे अक्सिजनया उत्पादन अप्वयेकेगु लागिं दुगु फुक्कं प्लान्ट सञ्चालन यायेगु तयारी जुयाच्वंगु जानकारी नं बियादिल ।

आइतवाः तकया ल्याःचाः कथं देशय् दुगु कोरोनाया कुल विरामी मध्ये ५० प्रतिशत विरामी स्वनिगलय् दुने दुसा ३८.४ प्रतिशत विरामी राजधानी येँय् जक लानाच्वंगु दु । कोरोना विरुद्ध ल्वानाः सेवा बियाच्वंपिं स्वास्थ्यकर्मी व यचुपिचु याइपिं कर्मचारीतय्त ५० प्रतिशत भत्ता बीगुया नापनापं वया छेँजःपिंत समेत जीवन बीमा यायेगु खँ नं प्रम ओलीं सम्बोधनय् धयादीगु दु ।