निषेधाज्ञां स्वनिगः सुनसान

येँ – कोरोना संक्रमण पनेगु लागिं स्वनिगलय् न्हिगः निसें लागू याःगु निषेधाज्ञां यानाः म्हिगः स्वनिगः छगुलिं ठप्प जुल । लँय् पास मज्वँसें पिहां वःपिं करिब निद्वःगः मोटर–साइकल व गाडीयात पनेगु ज्या जुल । लँय् खास यानाः नाका नाकाय् ट्राफिकं चेकिङ यानाः पनेगु ज्या याःगु खः ।
म्हिगः सतकय् दकलय् अप्वः खाद्यान्न ल्ह्यइगु गाडी, लः ल्ह्यइगु ट्यांकर व एम्बुलेन्स जक चले जूगु खने दत । सरकारं छवाःया लागिं निषेधाज्ञा जारी यायेवं म्हीग बहनी तक आपालं मनूत स्वनिगः त्वःताः पिहां वनेधुंकूगु दु ।

थ्व हे झ्वलय् कोभिड–१९ संकट व्यवस्थापन केन्द्र (सीसीएमसीं) संक्रमण व बन्दाबन्दीइ जनताया समस्या बारे न्यनेत संयन्त्र गठन याःगु दु । सीसीएमसीया निर्देशक उपप्रधानमन्त्री ईश्वर पोखरेलं बिहीवाः जनताया गुनासो, उजुरी व सुझाव तत्काल कार्यान्वयन यायेगु निंतिं संयन्त्र गठन यानादीगु खः ।

जनतां टोल फ्री नम्बर ११४० य् फोन यानाः नीप्यघौया दुने समस्या समाधान जुइगु कथं संयन्त्र दयेकूगु दु । उकथं हे शव व्यवस्थापनया निंतिं १०५ व एम्बुलेन्सया निंतिं १०२ लय् सम्पर्क तयेत नं सीसीएमसीं इनाप याःगु दु । विदेश वनीपिं व विदेशं वइपिंसं www.ccmc.gov.np वेब साइट चायेकाः फारम भरे यायेत नं इनाप याःगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन