शाक्य फाउन्डेसनया झिंन्हय्क्वःगु दँमुँज्या

येँ – दी शाक्य फाउन्डेसन, नेपालया झिंन्हय्क्वःगु दँमुँज्या संस्थाया अध्यक्ष अमीरमान शाक्यया सभापतित्वय् जुल । शील प्रार्थनापाखें न्ह्याःगु ज्याझ्वः फाउन्डेसनया वरिष्ठ सल्लाहकर देवकाजी शाक्यं त्वाःदेवाय् मत च्याकाः उलेज्या यानादीगु खः । फाउन्डेसनया हे मिसा पुचःपाखें लसकुस म्येँ न्ह्यब्वःगु ज्याझ्वलय् न्वकु राजकाजी शाक्यं लसकुस यानादीगु खः ।

संस्थाया कार्यवाहक मूछ्याञ्जे ज्ञानबहादुर शाक्यं वार्षिक प्रतिवेदननापं भावी ज्याझ्वः न्ह्यब्वयादीगु ज्याझ्वलय् दांभरिं माणिकरत्न शाक्यं आर्थिक प्रतिवेदन न्ह्यब्वयादीगु खः । निगुलिं प्रतिवेदन व्यापक सहलह लिपा पारित याःगु खः । दँमुँज्याय् प्रदेश नं. ३ या सांसद शोभा शाक्य, राजेश शाक्य, डा. वज्रराज शाक्यलिसें वरिष्ठ सल्लाहकार देवकाजी शाक्यं भिंतुना न्वचु बियादीगु खः ।

ज्याझ्वलय् देय्न्यंकंया शाक्य कुलपुत्रमध्ये दकलय् अप्वः ल्याः हयादीम्ह मिजंपाखे येँया प्रत्युसराज शाक्य व नुवाकोटया सार्थक शाक्य व मिसापाखे ख्वपया ओसिका शाक्ययात फाउन्डेसनया अध्यक्ष शाक्यं दसिपौ लःल्हानादीगु खःसा जुजुभाइ–नानीछोरी शिक्षा पुरस्कारया दाता रमेश शाक्यं बुद्ध मूर्ति लःल्हानादीगु खः ।

अथे हे उगु ज्याझ्वलय् थः अबुयात जँलास्येँ दान याःम्ह सरिता महर्जनयात फाउन्डेसनपाखें नीद्वः तका आर्थिक ग्वाहालि लःल्हाःगु खः । ज्याझ्वलय् अशोकानन्द वज्राचार्य, माधवी शाक्यं छम्ह व माणिकरत्न शाक्य व शकिला शाक्यं छम्हेसित बिया वयाच्वंगु छात्रवृत्ति नं लःल्हाःगु खः ।
पुण्यानुमोदन यासे क्वचायेकूगु ज्याझ्वलय् प्रदेशसभा सदस्यपिंत लुमन्ति चिं नं लःल्हाःगु खः ।