माक्स मीगु ज्याय् हाकु बन्जाः

येँ – विश्वय् न्यनावंगु कोरोना भाइरसया कारणं स्वनिगलय् माक्सया हाकु बजाः शुरु जूगु दु । येँया क्षत्रपाटीइ च्वंगु आपालं वासःया होलसेल पसलय् थौंकन्हय् मास्क मदु धायेगु याःसां अप्वः ध्यबा कयाः चिनियाँ व्यापारीतय्त हे मीगु यानाच्वंगु खँ सीदुगु दु । म्हिगः छगू पुचः मास्क न्यायेत क्षत्रपाटीया फुक्क धयाथें होलसेल वासः पसः चाःहिउबलय् गुगुं नं पसलय् माक्सया लिसे सेनेटाइजर तकं लुइके मफुगु खः ।

भाइरस संक्रमणया कारणं नेपालय् माक्स अभाव जूगु धाःसां नं नेपालय् दुगु माक्स चिनियाँ व्यापारीतय्सं अप्वः ध्यबा पुलाः यंकाच्वंगु खँ धाःगु दु । न्हापा छगू प्याकेट मास्कया १७० निसें १८० तका तूगु खःसा आः उकिया भाः २००० तका थ्यनाच्वंगु खँ नं छम्ह व्यापारीं धाःगु दु । छगू प्याकेटय् न्यय्गू मास्क दइ ।

न्हापा छगू मास्कया ३.६० तका तूगु खःसा आः ४० तका तुयाच्वंगु दु । नेपालय् न्याना यंकूगु मास्क चिनियाँ व्यापारीतय्सं चीनय् छगू प्याकेटया न्याद्वः तकां तक मियाच्वंगु खँ नं उम्ह व्यापारीं धाःगु दु ।

नेपालय् मास्क अभाव यायेगुली वासःया डिलर्स स्वयां नं वासः पसलय् ज्या याइपिनिगु तःधंगु भूमिका दु । ज्या याइपिंसं पसःया मास्क चिनियाँ व्यापारीतनाप सम्पर्क यानाः मियाच्वंगु खँ धाःगु दु । कोरोना भाइरस संक्रमण अप्वयेवं छगू पुचलं भारतं आपालं मास्क हयाः चिनियाँ व्यापारीतय्त बीगु यानाच्वंगु खँ नं धाःगु दु ।