किपू म्हसीकेत किपा ब्वज्या व गोष्ठि

किपू- किपू नगरपालिकाया ग्वसालय् छन्हुया चित्रकला गोष्ठि व चित्रकला ब्वज्या जुल । किपू देय्यात चित्रकलाया माध्यमं म्हसीकेगु ल्याखं छन्हुया उगु गोष्ठि जूगु खः ।

ऐतिहासिक, सांस्कृतिक, पर्यटकीय नगरी किपू देय्यात चित्रकला माध्यमं म्हसीकेगु ल्याखं जूगु गोष्ठि व चित्रकला ब्वज्या नेपाल पर्यटन बोर्ड व द पीस थट स्पोर्टस् कमिसन (कासा मार्फत शान्ति आयोग)या सहकार्यय् वंगु मंगलवाः जूगु खः ।

किपू देय्या दकलय् तजाःगु थाय् वडा नं. २ क्वाःच्व (उमा महेश्वर देगः) परिसरय् जूगु गोष्ठिया उलेज्या प्रतिनिधिसभा सदस्यलिसें नेपाल ओलम्पिक कमिटीया अध्यक्ष जीवनराम श्रेष्ठं उलेज्या यानादीगु खः ।

गोष्ठिया उलेज्या यासें मूपाहां प्रतिनिधिसभा सदस्य श्रेष्ठं यइपुसे च्वंगु किपू देय्यात पर्यटन उद्योगलिसे स्वाना यंकेमाःगु खँय् बः बियादिल । वय्कलं येँ देय् चाःहिउ वइपिं न्ह्याःम्हं पर्यटकयात किपू देय् छक्वः नं चाःहिलेत वये हे माःगु कथं प्रचार प्रसार यायेगु नापं उकिया निंतिं आवश्यक पूर्वाधार नं तयार यायेमाःगु सुझाव बियादिल ।

ज्याझ्वःया सभापतिलिसें किपू नगरपालिकाया प्रमुख रमेश महर्जनं किपू देय्यात म्हसीकेया निंतिं थप आयाम स्वरुप चित्रकारतय्सं च्वःगु किपाया निंतिं वय्कःपिंत सुभाय् देछानादिल ।

किपू नगरपालिकाया उपप्रमुख सरस्वति खड्कां लसकुस यानादीगु ज्याझ्वलय् नांजाःम्ह वरिष्ठ चित्रकार किरण मानन्धर, कलाकार सुष्मा राजभण्डारी, नेपाल ओलम्पिक कमिटीया मूछ्याञ्जे निलेन्द्रराज श्रेष्ठ लगायतया वक्तापिंसं नं किपू देय्यात म्हसीकेगु थीथी पक्षयात कयाः नुगःखँ तयादीगु खः ।

किपू नगरपालिका वडा नं. १या वडाअध्यक्ष हर्ष महर्जन, ३ वडाअध्यक्ष राजेन्द्र महर्जन, ६ वडाअध्यक्ष न्हुछेबहादुर महर्जन, ९ वडाअध्यक्ष गंगाराम महर्जन व १० वडाअध्यक्ष अमन महर्जन लगायतया जनप्रतिनिधिलिसें स्थानीयतय् उपस्थिति दुगु ज्याझ्वलय् किपू नगरपालिका वडा नं. २ या वडाअध्यक्षलिसें किपू नगरपालिका संस्कृति, पर्यटन समितिया संयोजक रमेशमान डंगोलं सुभाय् देछानादीगु खः ।

नांजाःपिं न्हय्म्ह वरिष्ठ कलाकारलिसें मुक्कं स्वीन्हय्म्ह कलाकारं किपूया थीथी पक्षयात कयाः च्वयातःगु किपा ब्वज्याय् तयातःगु खः । ब्वज्याय् किपूया थीथी थाय्बाय्, सम्पदा, संस्कृति, स्थलगतलिसें जीवनशैलीया मूर्त व अमूर्त किपा तयातःगु खः । किपा च्वयादीपिं कलाकारपिंत कदरपत्र नं लःल्हाःगु खः ।

सम्बन्धित बुखँ

LEAVE YOUR COMMENTS