मस्तय्त संक्रमणया दर अप्वल

येँ – कोभिड १९ या संक्रमण अप्वया वनाच्वंगु नेपालय् थुगुसी थगुने स्वयां मस्तय्त संक्रमण जुइगु अप्वःगु दु । थगुने फुक्कं संक्रमितत मध्ये २० दँ स्वयां क्वय्यापिं संक्रमितत ८ प्रतिशत स्वया म्हो जक दुगु खः । तर थ्व पालय् थ्व उमेर समूहया संक्रमिततय् ल्याः १० प्रतिशत स्वयां अप्वः खनेदये धुंकूगु खँ इपियोडिमियोलोजी तथा रोग नियन्त्रण महाशाखाया निर्देशक डा. कृष्णप्रसाद पौडेलं धयादीगु दु ।

वय्कःया कथं स्वनिगलय् आः कोभिड खनेदुपिं न्हूपिं संक्रमितत मध्ये १० निसें २० दँ तकयापिं थ्यंमथ्यं १० प्रतिशत दुसा झिदँ क्वय्यापिं ६ प्रतिशत दु । डा. पौडेलं थ्व पालय् शहरय् च्वंपिं मस्तय्त अप्वः संक्रमण खनेदया वःगु जानकारी नं बियादीगु दु । पोखराय् आः खनेदुपिं न्हूपिं संक्रमित मध्ये १८ दँ स्वयां क्वय्यापिं ५० प्रतिशत दु ।

आःया तथ्यांक स्वयेबलय् मस्तय्त संक्रमण अप्वया वयाच्वंगुलिं स्कूलत बन्द यायेगु हे बांलाइगु स्वास्थ्यविद्तय् धापू दु । वंगु वालय् जक कोरोना संक्रमणया कारणं कान्ति बाल अस्पतालय् छम्ह मचा सीगु खः । स्कूलया कक्षा क्वथाय् वा बसय् मस्तय्त २ मिटर तापाक तये मफइगु खँ धासें स्वास्थ्यविद्तय्सं मस्तय्त संक्रमणपाखें बचे यायेगु खःसा आःयात स्कूल बन्द यायेगु हे दकलय् बांलाःगु उपाय जुइगु खँ धाःगु दु ।

स्वास्थ्यविज्ञतय्सं थ्व पालय् मस्तय्त कोभिडया लक्षण नं मेगु कथं हे खनेदुगु खँ धाःगु दु । न्हापा संक्रमण जुल धाःसा तसकं ज्वर वइगु, सुक्खा मुसु वइगु व सासः ल्हाये थाकुइगु, सवाः कायेमफइगु जुइगु खः । थ्व पालय् धाःसा झाराबान्ता जुइगु, तसकं कमजोर जुइगु व तसकं त्यान्नु चायेकीगु लक्षण खनेदइ ।

सम्बन्धित बुखँ

LEAVE YOUR COMMENTS