काबुल विमानस्थलय् न्यान्हुया दुने १२ म्ह सित

एजेन्सी- आफगानिस्तानया राजधानी काबुलय् च्वंगु हामिद कारजाइ अन्तर्राष्ट्रिय विमानस्थलय् न्यान्हुया दुने १२ म्ह मनू सीगु दु । अन्तर्राष्ट्रिय सञ्चार माध्यमयात तालिबानया छम्ह अधिकारीं थःगु नां गोप्य तयेगु शर्तय् वंगु आइतवाः निसें आःतकया दुने विमानस्थल दुने व पिने यानाः १२ म्ह मनू सीगु जानकारी बिउगु खः । तालिबानया अधिकारीं मनूत गोली लानाः व भागदौडय् लानाः सीगु धाःगु दु । उम्ह अधिकारीं यात्रा यायेत माःगु आवश्यक भ्वँ मदुपिंत देस त्वःताः पिहां वनेगु अनुमति मबियागु व दक्वसित छेँय् लिहां वनेत इनाप यानागु जानकारी नं बिउगु खः ।

अफगानिस्तान तालिबानं कब्जाय् कायेधुंकाः द्वलंद्वः मनूत देय् त्वःताः पिहां वनेत स्वयाच्वंगु दु । थीथी देसं थःपिनि नागरिकतय्गु उद्धार नं यानाच्वंगु दुसा अफगानी नागरिकतय्त धाःसा देस त्वःता वनेत समस्या जुयाच्वंगु दु । अफगानी नागरिकतय्के पिहां वनेत माःगु दक्व भ्वं दुसां तालिबानतय्सं पनाच्वंगु दु । काबुलय् च्वंगु विमानस्थल अमेरिकी सेनाया नियन्त्रयण दुसां विमानस्थलं पिने तालिबानं कब्जा यानातःगु दु ।

थ्वया हे दथुइ अफगानिस्तानया राष्ट्रपति असरफ घानीयात संयुक्त अरब इमिरेट्स (युएइं) शरण बिउगु दु । यूएईया विदेश मन्त्रालयं घानी व घानीया छेँजःपिंत मानवीय नातां थःपिनिगु देसय् लसकुस यानागु धाःगु दु । थीथी सञ्चार माध्यमं राष्ट्रपति घानी न्हापा ताजिकिस्तान वंगु धाःगु खःसां घानीया सुरक्षागार्डं उज्बेकिस्तानय् वंगु धाःगु खः । बुधवाः बहनि लिबाक फेसबुक लाइभय् वयाः घानीं देसं बिसिउँ मवनागु दाबी यासें देसयात तःधंगु दुर्घटनां बचे यायेत, देसय् रक्तपात मजुइकेत व अराजकता पनेत देस त्वःतागु धाःगु खः । घानीं अफगानिस्तान लिहां वयेगु विषययात कयाः खँ जुयाच्वंगु नं धाःगु खः । अथे हे घानीं थःम्हं ध्यबा ज्वनाः देस त्वःतूगु धकाः लानाच्वंगु द्वपंया खण्डन नं याःगु दु । घानीयात १६.९ करोड डलर ज्वनाः वंगु द्वपं दु ।

मेखे तालिबानयात अन्तर्राष्ट्रिय समुदायं समर्थन मयाःगुलिं अन्तर्राष्ट्रिय मुद्रा कोष (आइएमएफं) थःपिनिगु कोषय् आः अफगानिस्तानयात थाय् मबिइगु निर्णय याःगु दु । आइएमएफं अफगानिस्तानयात आर्थिक संकटलिसे ल्वायेत ३७ करोड डलर बिइत्यंगु खः । अथे हे अमेरिकां अमेरिकाया फेडेरल रिजभयर्् च्वंगु अफगानिस्तानया केन्द्रीय बैकया ७ अरब डलर नं रोक्का याःगु दु ।

अफगानिस्तानय् मिसा कासामिया भविष्य नं खतराय्
अफगानिस्तानय् तालिबानं कब्जा यायेवं आफगानिस्तानया मिसापिं कासामितय्गु भविष्य नं खतराय् लाःगु दु । अफगानिस्तानया मिसा कासामित तसकं ग्यानाच्वंगु सञ्चार माध्यमतय्सं धाःगु दु ।

डेनमार्कय् च्वनाच्वंम्ह अफगानिस्तानया मिसा फुटबलया पुलांम्ह कप्तान खालिद पोपलं अफगानी कासामितय्त सामाजिक सञ्जालं थःपिनिगु एकाउन्ट डिलिट यायेत सल्हा बिउगु दु । अथे हे पोपलं सञ्चार माध्यमं थःपिनिगु दक्व किपा लिकायेत, थःपिनिगु कासालिसे स्वानाच्वंगु दक्व सामान च्याकाछ्वयेत व थःत सुचुकेत नं धाःगु दु । पोपलं फिफा वरियताय् १५२ औं थासय् दुगु महिला फुटबल टिमं फुटबल म्हिते मखनीगु नं धाःगु दु ।

फुटबल जक मखु, क्रिकेटया कासामित नं चिन्तित खनेदु । तालिबानं महिला क्रिकेट बन्द यायेफुु धकाः अफगानिस्तानया क्रिकेट बोर्डं धाःगु दु । अफगानिस्तान टेस्ट मान्यता प्राप्त देय् खः । आइसीसीया नियमकथं टेस्ट मान्यता दुगु देसं मिस्ततय्गु टिम दयकेमाःगु नियम दुगुलिं अफगानिस्तानं मिस्ततय्गु क्रिकेट टिमं नं दयेकातःगु खः । अफगानिस्तानया मिस्ततय्गु क्रिकेट टिमं आतक छुं नं क्षेत्रीय कासाय् ब्वति काःगु मदुनि ।