नेपाः विरुद्ध भारतय् हडताल
येँ – स्वंगूगु देय् जुयाः भारतया कोलकाता बन्दरगाहं रेलपाखें तप्यंक नेपाःया सीमाय् सामान लोड जुयाच्वंगु कन्टेनर वइगु जुइवं कोलकाताय् च्वंपिं ढुवानी व्यवसायी व एजेन्टतय्सं हडताल याःगु दु । भारतीय केन्द्रीय अप्रत्यक्ष कर लिसें सीमा शुल्क बोर्ड (सीबीआईसीं) नेपालय् वइगु सामानया ढुवानीइ कोलकाता बन्दरगाहपाखें अःपुक वये फइगु जुइवं अनया ढुवानी व्यवसायीत आन्दोलित जूगु खः ।
कोलकाता बन्दरगाहं थ्वहे वइगु फागुन ३ गते निसें जहाजं वइगु सामानया कन्टेनर रेलय् तयाः तप्यंक हे नेपाःया वीरगंज व विराटनगर तक हये फइगु व्यवस्था जूगु खः । थथे जुल धाःसा कोलकाताय् च्वंपिं ढुवानी व्यवसायीतय्त ज्या मदइगु जुल धासें उमिसं हडताल शुरु याःगु खः ।
अनलाइनय् आधारित इलेक्ट्रोनिक कार्गो ट्रयाकिङ सिस्टम (ईसीटीएस) लागू यानाः तत्काल रेलमार्गपाखें सामान ढुवानी याइगु जुइवं कोलकाताय् च्वनाः नेपाःया व्यापारीतय् लागिं ज्या याना बीपिं एजेन्ट नं आवश्यक जुइ मखु । उकिं उपिं नं हडतालय् कुहां वःगु खः ।
हडताल यानाच्वंपिं व्यवसायी– तय्सं थ्व निर्णय लित मकाल धाःसा फागुन ३ गतेनिसें रेलसेवा हे बन्द यायेगु ख्याच्वः बिउगु दु ।
कोलकाता भन्सारय् भ्वंया प्रक्रिया चीकेधुंकाः नेपाःया आयातय् लगे जुयाच्वंगु डिमरेज चार्ज व मेमेगु खर्च समेत यायेबलय् नेपाःया व्यापारीतय्त दँय् ८ अर्ब तका फाइदा जुइगु तथ्यांक पिहां वयाच्वंगु दु ।
न्हूगु व्यवस्था कथं स्वंगूगु मुलुकं कोलकाता व हल्दिया बन्दरगाह तक वइगु सामान आः शिपिङ कम्पनीं हे तप्यंक रेलपाखें ढुवानी यानाः नेपाःया वीरगंज व विराटनगर भन्सार तक थ्यंका बी । कोलकातय् जुइगु भन्सारया प्रक्रियाय् करिब १३ किसिमया भ्वं तयार याये माःगु जुयाः उकिया लागिं नेपाःया व्यापारीतय्सं एजेन्ट हे नियुक्त याना तइगु खः । आः शिपिङ कम्पनीं हे सामान ढुवानी याइबलय् अज्याःगु भ्वं नं दयेका च्वने म्वाः ।
थुकिं यानाः थःपिनि ज्या मदइगु जुल धासें अनया एजेन्टतय्सं शिपिङ कम्पनीं दादागिरि चले यात धासें सामान ढुवानी याइगु रेल पनेगु ख्याच्वः बिउगु दु । लिसें उमिसं आः हे ज्या दिकाः समस्या पिकायेगु खँ नं धाःगु दु । मेखे हडताल यानाच्वंपिं एजेन्ट व ढुवानी व्यवसायीतय्सं ग्वहालि मयात धाःसा मेगु हे बन्दरगाहय् कन्टेनर यंकाः ढुवानी यायेगु खँ कोलकातास्थित नेपाली महावाणिज्य दूतावासं धाःगु दु ।
वइगु फागुन ३ गते निसें रेलपाखें ढुवानी जुइगु कन्टेनरय् जीपीएस प्रणालीइ आधारित ईसीटीएस जडान यायेगु व सीमावर्ती भारतीय भन्सारं शील चेक यानाः नेपाःपाखे छ्वया हयेगु व्यवस्था याइ । थुकिं यानाः नेपाःया व्यापारीतय्गु ध्यबा बचे जुयाः सामान हे दनीगु तक खँ धाःगु दु ।
LEAVE YOUR COMMENTS