माओवादीं प्यम्ह सांसदतयात कारवाही यात

येँ – नेकपा (माओवादी केन्द्रं) पार्टी त्वःताः एमालेय् वंपिं प्यम्ह सांसदयात पदं चीकूगु दु । माओवादी प्रमुख सचेतक देव गुरुङं माओवादी केन्द्रपाखें निर्वाचित जूपिं प्रतिनिधिसभाया प्यम्ह सांसदपिं लेखराज भट्ट, टोबहादुर रायमाझी, प्रभु साह व गौरीशंकर चौधरीयात पार्टी त्वःताः मेगु पार्टीइ दुहां वंगुलिं उमित सांसद पदं चीकेमाल धकाः माओवादीया अध्यक्ष पुष्पकमल दाहालं च्वःगु पौ म्हिगः संसद सचिवालयय् बुझे याःगु खः ।

माओवादी केन्द्र त्वःताः वंपिं मध्ये भट्ट उद्योग वाणिज्य तथा आपूर्ति मन्त्री जुयाच्वंगु दुसा रायमाझी ऊर्जा मन्त्री जुयाच्वंगु दु । उकथं हे साह सहरी विकास मन्त्री खःसा चौधरी श्रममन्त्री खः ।

माओवादी केन्द्रं कारवाही याःपिं प्यम्हं मन्त्री जुयाच्वंगु दुसा उमित एमालेया अध्यक्ष लिसें प्रधानमन्त्री केपी ओलीं केन्द्रीय दुजः कथं मनोनित यायेधुंकूगु दु । संसद अधिवेशन न्ह्यानाच्वंगु इलय् सांसदपिंत उगु पदं चीकेधुंकाः उकिया सुचं प्रतिनिधिसभा बैठकय् सभामुखं जानकारी याकेमाःगु प्रावधान दु ।

उकथं हे गृहमन्त्री रामबहादुर थापायात नं पार्टीं सांसद पदं चीकीगु जूगु दु । नेपाल कम्युनिष्ट पार्टी विभाजन जुइधुंकाः गृहमन्त्री थापा लगायत न्याम्ह मन्त्री ओली नेतृत्वया एमालेय् दुहां वंगु खः ।

सम्बन्धित बुखँ

LEAVE YOUR COMMENTS