धर्मचक्र दिवसया लसताय् प्रवचन व अन्तक्र्रिया ज्याझ्वः

ख्वप – बौद्ध संघ भक्तपुरया ग्वसालय् २६०८ क्वःगु धर्मचक्र प्रवर्तन दिवसया लसताय् प्रवचनलिसें अन्तक्र्रियात्मक ज्याझ्वः जुल । ज्याझ्वलय् भिक्षु विपस्सी महास्थविरं धर्मचक्र प्रवर्तन दिवसया महत्वया बारे कनाबिज्यासें थ्व दिं धइगु वास्तवय् धर्मचक्र चाःहिकेत जूगु तयारीया दिं नं खः धयाबिज्यात ।

वसपोलं धर्मचक्र चाःहिकेत ऋषिपतन मृगदावन स्थान ल्यया बिज्याःगु खः । प्रवचन ज्याझ्वलय् वसपोलं व्यक्तिया रुपय् पञ्चवर्गीय भन्तेपिंत ल्यया बिज्याःगु नं धर्मचक्र प्रवर्तन दिवसया छगू महत्वपूर्ण पक्ष जूगु विषयय् विस्तृत रुपं कनाबिज्यात । सहम्पति ब्रम्हां धर्मोपदेश यायेत प्रार्थना याना बिज्याःगु छगू हेतु जक खः धासें थम्हं हे थुइकाः याइगु ज्ञानया प्रचार वास्तविक प्रचार खः धयाबिज्यात ।

धर्मचक्र प्रवर्तन यायेत ल्यःगु थाय्, ई, व्यक्ति व विषययात कयाः नं वसपोलं ध्वाथुइक कनाबिज्यात । संघरत्न शाक्यया सभापतित्वय् पंचशील ग्रहण यासें न्ह्याःगु ज्याझ्वलय् संघया नायः त्रिरत्न शाक्यं लसकुस यानादीगु खः ।

प्रवचन समितिया दुजः लक्ष्मीचन्द्र वज्राचार्यं न्ह्याकादीगु अन्तक्र्रियात्मक ज्याझ्वलय् उपस्थितपिंसं ल्ह्वनादीगु जिज्ञासा व न्ह्यसःया लिसः नं वसपोल भन्ते नं बियाबिज्याःगु खः । मुनि विहारय् जूगु ज्याझ्वलय् सभापति शाक्यं उपस्थित सकसितं सुभाय् देछानादिसें धर्मचक्र प्रवर्तन दिवसया लसताय् सकसिकें शील पालना यायेगु श्रद्धा अप्वयेमा धकाः कामना नं यानादिल ।