थुगुसी वा वयेगु म्हो जुइ, तांन्वइगु अप्वइ

येँ -जल तथा मौसम विभागं अझ मेगु स्वन्हु तक नं मौसम आः थें हे घुम्म जुयाच्वनीगु खँ धाःगु दु । स्वन्हु तक वायुमण्डल स्थिर हे जुयाच्वनीगु कारणं मौसम सुधार मजुइगु अनुमान विभागं याःगु खः ।
विभागया प्रवक्ता सुमनकुमार रेग्मीं म्हिगः छगू वक्तव्य हे जारी यासें आपालं जिल्लाया जंगलय् मि च्यानाच्वंगु कारणं उकिं ब्वलंकूगु कुँया कणत वायुमण्डलय् सञ्चित जुयाः असमान्य कथंया खसु मुंवंगु खँ धयादीगु दु ।

मौसमया थ्व असामान्य स्थितिं यानाः स्वनिगलय् पारदर्शिता समेत म्हो जूवंगु दुसा जनजीवन तकं प्रभावित जुयाच्वंगु दु । थुकिं यानाः मनूतय्त मिखा पालुइगु, सासः ल्हाये थाकुइग थेंज्याःगु स्वास्थ्य समस्या समेत ब्वलनाच्वंगु दु । विभागं म्वाःसां म्वाःसां पिहां मवनेत व पिहां वने हे माःसां मास्क तयाः जक पिहां वनेत समेत सर्वसाधारण सकसितं इनाप याःगु दु ।

थुगु दँय् नेपालय् पोष्ट–मनसुन सिजनय् आपालं थासय् सरदर स्वयां म्हो जक वा वःगु व चिकुलां नं यक्व थासय् माक्व स्वयां म्हो जक वा वःगु खः ।

थौंकन्हय् मनसुन पूर्वया ई खःसां नं म्हो जक वा वःगुलिं वायुमण्डल सुक्खा जुयाच्वंगु दु । थुकिं यानाःआः मार्च, अप्रिल व मे महिनाय् नेपालय् औसत तापक्रम सरदर स्वयां अप्वयाः तांन्वइगु व वा वयेगु क्रम नं सरदर स्वयां म्हो जुइगु सम्भावना दु । अज्याःगु इलय् त्वनेगु लःया अभाव, छेँ मिं नइगु व जंगल च्याइगु थेंज्याःगु घटना जुइफु धकाः नं विभागं ध्यानाकर्षण याःगु दु ।

सम्बन्धित बुखँ

LEAVE YOUR COMMENTS