‘लकडाउन यायेगु ग्वसाः मदु’

येँ- नेपालय् नं यदि कोरोना संक्रमण अप्वया वन धाःसा लकडाउन हे याये मालेफु धकाः सरकारी अधिकारीतय्सं धायेगु याना हःसां सरकारं धाःसा आः थथें लकडाउन यायेगु बारे सरकारं बिचाः मयाःनिगु खँ धाःगु दु ।

प्रधानमन्त्री केपी शर्मा ओलीं नं आः थथें लकडाउन हे यायेगु बारे सरकारं छुं तयारी मयाःगु खँ कनादीगु दु । अथे हे सरकारया प्रवक्ता प्रदिप ज्ञवालीं नं कोरोना पनेगु नामय् सरकारं अनेक उपाय नालेगु जुइ तर लकडाउन धाःसा मयायेगु खँ कनादीगु दु ।

सरकारं लकडाउन यायेगु मधाःसां थीथी जिल्लाय् धाःसा हुल जुइके मबीगु, भीड याके मबीगु, सभा याके मबीगु सुचं सार्वजनिक याना हःगु दु । छुं न्हि न्ह्यः मकवानपुर जिल्लाय् अज्याःगु सुचं पित बिउगु खःसा आः दाङय् नं हुलहाल मयायेत सुचं पित बिउगु दु ।

उकथं हे आः भारतलिसे सीमा स्वाःगु जिल्लाय् स्वास्थ्य सम्बन्धी हेल्थ डेस्कयात कडाई याना हःगु दुसा भारतं वइपिं मनूतय्त जाँच यानाः जक दुकायेगु शुरु याना हःगु दु । आवश्यक जुल धाःसा विरामीयात अन हे आइसोलेशनय् तयेगु नं तयारी यानाच्वुं दु ।