साझाया कार्डया नां नेपालमण्डल, बसय् लिपि
येँ – आः साझा बस गयेबलय् ध्यबा पुलाच्वनेगु झंझट मंत । बस गये–बलय् नं कार्डं ध्यबा पुलेगु लागिं ‘यात्रा कार्ड’ पित बिउगु दु । प्रदेश ३ या मुख्य मन्त्री डोरमणि पौडेलं उकिया उलेज्या यानादीगु खः । आःयात साझा यातायातया गाडीइ जक निं प्रयोग याये फइगु थ्व कार्ड लिपा ३ नम्बर प्रदेश अन्तर्गतया फुक्क जिल्लाया सार्वजनिक बसय् प्रयोग याये फइ। प्रदेश ३ दुने प्रयोग यायेगु ताः तयातःगु जुयाः उगु कार्डया नां हे ‘नेपालमण्डल यात्रा कार्ड’ तःगु दु ।
उगु हे ज्याझ्वलय् साझा यातायातं आः भविष्यय् विद्युतीय गाडी न्यायेगु लागिं प्रदेश ३ सरकार, येँ मनपा व यल मनपालिसे नं सम्झौता याःगु खः । वहे सम्झौता अन्तर्गत प्रदेश ३ या सरकारपाखें ३० करोड तका व यल मनपापाखें २ करोड ५० लाख तका दां साझा यातायात सहकारीया नायः कनकमणि दीक्षित यात लःल्हाःगु खः ।
लिसें उगु हे ज्याझ्वलय् येँ महानगरपालिकापाखें साझा यातायातयात न्याना बिउगु युरो–४ मापदण्डया २० गः गाडी नं लःल्हाःगु खः । थ्व गाडी म्हिगःनिसें हे सञ्चालनय् नं वये–धुंकूगु दु ।
ज्याझ्वलय् न्ववासें मुख्यमन्त्री पौडेलं आः वइगु झिदँया दुने कमसेकम नं प्रदेश ३ य् डिजेल व पेट्रोलं चले जुइगु गाडी पूर्ण रुपं बन्द यायेगु ताः तयाः आः विद्युतीय गाडी चले याकेगु अभियान न्ह्याकाच्वनागु खँ कनादिल । वय्कलं राजधानी येँदय् यचुपिचु यायेत प्रदेश सरकारपाखें नं १२ गः ब्रुमर न्यानाः छ्वया हयेत्यनागु खँ अन कनादिल ।
येँ मनपाया प्रमुख विद्यासुन्दर शाक्यया सभापतित्वय् जूगु उगु ज्याझ्वलय् यल मनपाया मेयर चिरिबाबु महर्जन, प्रदेश ३ या अर्थ मन्त्री कैलाशप्रसाद ढुंगानापिंसं नं न्ववानादीगु खः ।
साझा बसय् लिपि
म्हिगःनिसें येँय् सेवा शुरु याःगु युरो–४ मापदण्डया २० गः साझा यातायातया बसय् रञ्जना लिपि नं प्रयोग जूगु दु । गुलिं बसया लिउनेपाखे ‘सहकार्य ः येँ महानगरपालिका’ धकाः च्वयातःगु दुसा गुलिं बसया सिथय्पाखे ‘येँ महानगरपालिका नाप जानाः’ धकाः रञ्जना लिपिं च्वयातःगु खः ।
LEAVE YOUR COMMENTS