रेशम चौधरीपिं रिहा जुइ !

जितिया पर्वय् पुष्पकमल दाहालया घोषणा –

येँ – सत्तारुद दल नेपाल कम्युनिष्ट पार्टीया अध्यक्ष पुष्पकमल दाहालं टिकापुर घटनाया मू अभियुक्त कथं कयातःपिंत ससम्मान जेलं रिहा यायेत्यनागु खँ कनादीगु दु । थारुतय् पर्व जितियाया लसताय् सुनसरीया झुम्काय् जूगु छगू ज्याझ्वलय् न्ववासें वय्कलं उगु खँ धयादीगु खः।

दाहालं टिकापुर घटनाया फुक्कं ‘झुटा मुद्दा’ खारेज यायेगु राजनैतिक–सैद्धान्तिक सहमति जुइधुंकूगुलिं कैलाली १ पाखें निर्वाचित व अदातलं जन्मकैदया फैसला न्यंकाः जेल चलान जूम्ह रेशम चौधरी नं ससम्मान रिहा जुइगु घोषणा यानादीगु खः । दाहालं न्ह्यःने धयादी, ‘टिकापुरया सन्दर्भ थन नं वल, उकुन्हु तिनि बालुवाटारय् सहलह जूगु दु ।

फुक्कं झुटा मुद्दात खारेज जुइमाः धइगु सैद्धान्तिक सहमति जूगु दु । छुं ई लिपा झुटा मुद्दा खारेज जुइ । गुपिं बन्दी अवस्थाय् दु, फुकसितं त्वःतेगु जुइ । जनताया मतं निर्वाचित जूम्ह माननीय ससम्मान पिहां वइ धइगु जिगु विश्वास दु ।’

अध्यक्ष दाहालं आःया संविधानय् थःगु नं ‘रिजर्भेसन’ दुगु खँ धासें थम्हं चाहे मजूसां थौं न्ववायेमाः धकाः धयादिल, ‘जि संविधानसभाया राजनीतिक दलया छम्ह थज्याःम्ह नेता खः, सुनां थ्व संविधान पूर्ण जूगु मदु, थुकी मेगु आपालं संशोधन यायेमाःगु दु धकाः रिजर्भेसन तया । मेपिं गुगुं नं पार्टीं मतः ।

जि हे उगु पार्टीया नेता खः, गुम्हेस्यां उकी रिजर्भेसन तया, बिस्कं मत तयाः नोट अफ डिसेन्ट संविधानसभा दुने हे तयातःगु दु ।’ थः निक्वःखुसी प्रधानमन्त्री जुयागु इलय् नं संविधान संशोधन यायेगु निंतिं निक्वः तक संसदय् दर्ता यानागु खँ न्ह्यथनादिसें अध्यक्ष दाहालं आदिवासी जनजाति, दलित, थारु, मधेशी, मुस्लिम मिसापिं फुकसितं संवैधानिक प्रक्रियापाखें शान्तिपूर्ण रुपं संविधान संशोधनया निंतिं न्ह्याः वनेत अपिल यानादीगु दु ।

अध्यक्ष दाहालं सम्बोधन यायेगु झ्वलय् न्हय्दँ संघर्ष यानाः, द्वलंद्वःया बलिदान बियाः हयागु गणतन्त्र, संघीय लोकतान्त्रिक गणतन्त्रया विरुद्ध उच्छृङ्खल व अराजक तत्वं बदनाम यायेत स्वयाच्वंगु द्वपं नं बियादिल । दाहालं स्वतन्त्रताया नामय् अराजक, उच्छृङ्खल, समाजय् घृणा ब्वलंकेगु व वितृष्णा न्यंकेगु कथंया ज्या जुयाच्वंगु दु, नकारात्मक सोचयात तिबः बीगु कुतः जुयाच्वंगु दु ।

अथे खःसां नं अज्याःगु प्रवृत्ति तःधंगु शक्तिया रुपय् मखुसां नं संघीय लोकतान्त्रिक गणतन्त्रयात मछिंगु अवस्थाय् लाकेत स्वयाच्वंगु दु धयादिल । वय्कलं म्हिगःया जुजुपिं पर्दा लिउने च्वनाः कासा म्हिताच्वंगु द्वपं नं बियादीगु दु ।

सम्बन्धित बुखँ

LEAVE YOUR COMMENTS