धरहराया मस्जिदय् हाकनं विवाद

येँ -थनया धराहरा नापसं निजी जग्गाय् तथाकथित मस्जिद दयेकाः च्वनाच्वंपिं मुस्मांतय्सं थनाहःपिं उगु हे जग्गा आश्रित जुयाच्वंपिं खड्गी परिवार व परियार परिवारं म्हिगः हाकनं अन च्वं वनेगु कुतः याःबलय् विवाद जूगु दु ।

मुस्मांतय्सं थ्व थासय् न्हापांनिसें मस्जिद दुगु धासें उगु थासय् च्वनाच्वंपिं छथ्वः खड्गी परिवार व छथ्वः परियार परिवारयात थनाहःगु खः । तर थ्व थाय् धाःसा निजी जग्गा जूगु फैसला सर्वोच्च अदालतं हे याना तयेधुंकूगु दु ।

न्हापांनिसें च्वनाच्वंपिं खड्गी परिवारपिंत मंगलवाः नं तये मखु धकाः धायेवं विवाद जूगु खँ येँ महानगरपालिका २२ वडाया अध्यक्ष चिनिकाजी महर्जनं धयादीगु दु । वय्कलं थ्व थासय् खड्गी परिवार व परियार परिवारयापिं न्हापांनिसें च्वनाच्वंगु जूगुलिं उमित अन हे पुनस्र्थापित यायेमाःगु व अथे मजुल धाःसा विवाद अझ तच्वया वनीगु खँ धयादीगु दु ।