ठेकेदार ज्वनेत न्हूगु कार्यविधि
गृह व उर्जा मन्त्रीया मंकाः पहल
येँ – सरकारं सञ्चालन यानाच्वंगु तःधंगु परियोजनाया ज्या इलय् सिमधयेकीपिं निर्माण व्यवसायीतय्त कारबाही यायेगु लागिं गृह मन्त्रालयं विशेष कार्यविधि हे हइगु जूगु दु । ज्या सिमधयेकीपिं ठेकेदारतय्त कारवाही यायेगु ज्याय् पंगः वयेवं गृह मन्त्रालयं थ्व बिस्कं कार्यविधि दयेकेत्यंगु खः ।
मन्त्रालयया छम्ह नां कने चाहे मजूम्ह अधिकारीं ‘नेपालभाषा टाइम्स’ यात थुकिया जानकारी बिसें ठेकेदारयात गृह मन्त्रालयं कारबाही यायेगु सम्बन्धय् गृह व भौतिक तथा पूर्वाधार मन्त्रालय दथुइ विवाद ब्वलंगुलिं गृह मन्त्रालयं थुकथं कार्यविधि दयेकेत्यंगु खः । निर्माण व्यवसायीतय्त कारवाही यायेगु आधिकारिक कानून सार्वजनिक खरिद ऐन २०६३ या गुगुं नं दफाय् ठेकेदारयात ज्वनेगु अधिकार गृह मन्त्रालययात बियातःगु मदु । उकिं आः गृहं ठगी मुद्दा अन्तर्गत व्यवसायीतय्त कारबाही कारवाही न्हूगु लँपु ज्वनेत्यंगु खः । ठेकेदारं ज्या सिधयेकेगु म्याद फुगु निदँ लिपा तक नं ज्या मयाइगु व वयां लिपा बजाःभाः थहां वन धकाः ध्यबा थपे यायेत अपिल याइगु जूगुलिं अथे याइपिंत आः ठगी मुद्दाय् लाकाः कारबाही याये फइगु खँ धाःगु दु ।
सार्वजनिक खरिद ऐन संशोधित २०७३ कथं ज्या सिमधयेकीगु निर्माण व्यवसायीया कम्पनीयात वयात सुनां ज्याया जिम्मा बिउगु खः वं हे जक हाकुगु धलखय् तक तये फइगु व्यवस्था यानातःगु दु । गृह श्रोतं धाः कथं कार्यविधि लागू जुल धाःसा गृह मन्त्रालयया कार्यक्षेत्र थप तचाः जुइ व वयां लिपा कारबाही यायेगु कानुनी लँपु नं चाली ।
थ्व स्वयां न्ह्यः गृह मन्त्रालयं ज्या मयाइपिं ठेकेदार कम्पनीया नां संकलन यानाः कारबाही प्रक्रिया न्ह्याकेत देय्न्यंकंया सिडिओयात निर्देशन बिउगु खः । सिडिओं येँय् जक १३० म्ह स्वयां अप्वः ज्या मयाःपिं ठेकेदारया नां मुंकाः महानगरी प्रहरी प्रभाव टेकुइ छ्वया हयेधुंकूगु खँ सीदुगु दु ।
गृह व उर्जा मन्त्रीया मंकाः पहल
जलविद्युत लगायतया थीथी तःधंगु परियोजनाय् पिहां वइगु थीथी कथंया पंगः चीकेगु लागिं आः गृह मन्त्रालय व उर्जा मन्त्रालय लानाः मंकाः पलाः ल्ह्वनीगु जूगु दु । तःधंगु परियोजना न्ह्याकेगु ज्याय् पंगः थनीपिंत कारवाही यानाः ज्या सुचारु यायेगु लागिं आः गृह व उर्जा मन्त्रालयं मंकाः पहल यायेगु धकाः सहमति जूगु खः । लुमंकेबहः जू, गृह व उर्जा निगुलिं मन्त्रालयया मन्त्रीपिं छसिकथं रामबहादुर थापा व वर्षमान पुन निम्हं पूर्व माओवादी नेतात खः । गृहया ज्याय् असन्तुष्टि प्वंकूगु भौतिक मन्त्रालया मन्त्री रघुवीर महासेठ धाःसा पूर्व एमाले खः ।
LEAVE YOUR COMMENTS