ओलीं ख्याच्वः बिउसां नेपालया भेला शुरू

येँ – नेकपा एमालेया माधव नेपाल-झलनाथ खनाल पक्षया भेला सुरू जूगु दु । यल सानेपाया हेरिटेज गार्डेन पार्टी प्यालेसय् भेला सुरू जूगु खः । भेलाय् नेपाल-खनाल पक्षया यक्व कार्यकर्तातयसं ब्वति कयाच्वंगु दु ।

प्रधानमन्त्री केपी शर्मा ओलीं गुटगत भेला मयायेत ख्याच्वः बिसें नेपाल पुचलं यायेत्यंगु गुटगत भेलाय् मवनेत पार्टीया नेता कार्यकर्तातय्त निर्देशन बिउसां थाैंया भेला सुरू जूगु दु । ओलीं पार्टी अनुशासन उल्लंघन याःपिंत विधान व दल सम्बन्धी कानुनकथं कारबाही यायेगु ख्याच्वः समेत बियादीगु खः । पार्टीया केन्द्रीय दुजःतय्त सःताः म्हिगः बालुवाटारय् याःगु तुच्चा ज्याझ्वलय् न्ववासें प्रम ओलीं पार्टीया वरिष्ठ नेतातय्गु नां मकासे भेलाय् वन धाःसा कारबाही यायेगु ख्याच्वः बियादीगु खः ।

नेपाल-खनाल पक्षं म्हिगः हे थःपिनिगु भेला दीमखु धकाः धाःगु खः । थ्व भेला थाैं व कन्हय् न्ह्याइ ।