सौन्दर्य न्ह्याबलें ल्यंकातयेत नालादिसँ थुपिं ब्यूटि टिप्स

यक्व न्हापांनिसें हे नेचुरल व हर्बल ब्यूटी टिप्सया जानकारी कयाः खर्च छतिं हे मयासे लाउं बांलाकेगु याइगु खः । थुकिया निंतिं तरकारि, सिसाबुसा व मेमेगु अःपुक चूलाइगु चीज छ्यलीगु खः । वास्तवय् सौन्दर्यया थ्व प्राकृतिक साधन ख्वाःया सुन्दरताया दकलय् तःधंम्ह पासा खः । मसीतले ल्याय्म्ह ल्यासे, स्वस्थ व बांलाःम्ह जुयाच्वनेमा धयागु इच्छा ला सकसियां दइ, तर थ्व स्वाभाविक प्रक्रियायात पूवंक सुनानं पने फइमखु । पक्का नं खः कि वैज्ञानिकतय्सं थज्याःगु पोषक पदार्थ व चिकित्सा उपाय लुइकूगु दु, गुकिं थहां वंगु उमेरया असरयात यक्व हद तक कम यायेफइ । केरा, स्याउ, सन्तरासि, खरबुजा आदि सिसाबुसां सौन्दर्य अप्वयेकेफइ । सिसाबुसा व तरकारिया ख्वलायात झीसं ज्या मवःगु वस्तु धकाः वांछ्वयेगु याइ, जबकि थज्याःगु ख्वलां नं स्वास्थ्य व सौन्दर्यलिसे सम्बन्धित यक्व समस्या ज्यंकेफु ।

थुकी मध्ये छु छु हर्बल ब्यूटी टिप्स थन बियागु दु —
# ख्वाःया छ्यंगू फ्वफ्वः धाःसा छपु केरा ल्हातं न्हायाः वाच्यावाच्या वंकादिसँ, अनंलि उकी छगू चम्चा गुलाबजल व निफुति ग्लिसरिन ल्वाकछ्यानाः छगः सिसिइ जायेकादिसँ । समाः याये स्वयां बाघौ न्ह्यः हे थ्व नियमित क्रिम थें बुलादिसँ । अले भचा जायेकाः लुमुलुमु धाःगु लखं ख्वाः सिलादिसँ । छपु केराया थुगु लेप छिं रेफ्रिजेटरय् तयाः छवाः तक छ्यलादिसँ ।
# छिगु ख्वाःया छ्यंगू चिकं कंगु खःसा स्याउ छगःया ख्वला प्वलाः चिचिकुक तानादिसँ, अले ख्वालय् लेप थें तयादिसँ । बाघौ तक गंकादिसँ, अनंलि सिलाछ्वयादिसँ । स्याउं छ्यंगूयात क्यातुसे च्वंकातइ ।
# छिगु छ्यंगू ल्वःवनापु मजूसा सन्तरासि प्वलाः उकिया कुचा स्वच्छ लखय् ल्वाकछ्यानाः चिच्वःगु मिइ १५ मिनेट दायेकादिसँ । अनंलि ख्वाउँकाः छानय् यानादिसँ । ल्वःवनापु मजूगु छ्यंगूया निंतिं थुकिं भिंगु लोशनया ज्या याइ, अले छयंगू मखमल थें नाइसे च्वनावइ ।
# सँय् चिल्लो थें दयाच्वनीगु जुयाच्वन धाःसा स्याम्पुं म्वःल्हुइ धुंकाः कागतिया रस ल्वाकछ्यानातःगु लखं सँ चाया छ्वयेमाः । गबलें गबलें ख्वालय् हाकुगु चातः वयेयः । अज्याःगु चातः वंकेत न्हिं न्हिं द्यनेत्ययेकाः कागतिं ख्वालय् बुलादिसँ ।
# आलुया रसं म्हया छ्यंगू यचुपिचु धायेकाबी ।
# गाजर नं छताजि सौन्दर्यवद्र्धक तत्व खः । छ्यंगू ल्वःवनापुसे च्वंकेत गाजरया लेप तयादिसँ । गाजर मनाः चिचिकुक तानाः न्हायादिसँ । अले ३० मिनेट ख्वालय् पानातयादिसँ ।
# छ्यंगूया चिम्सँप्वाः खितिं जाल धाःसा कागति व गोलभ्याराया रस उति उति हे ल्वाकछ्यानाः उकिं बुत्तुबुलादिसँ ।
# गर्मि मौसमय् तुसिया रस मिखाय् तल धाःसा मिखा बांलाना वइ । तुसि चक्का चक्का तानाः मिखाय् दिकातल धाःसा वा छ्यंगुलिइ ब्वब्वस्यानाबिल धाःसां सौन्दर्य थकायेफइ ।
# गोलभ्यारा व लैंया रस उति उति हे ल्वाकछ्यानाः ख्वालय् २०–२५ मनेट बुला तयादिसँ, अनंलि ख्वाः सिलादिसँ । थुकिया नियमित प्रयोगं ख्वालय् वयाच्वंगु थीथी दाग दक्व वनी ।
# ताजागु गुलाबया स्वांहःयात बांलाक निनाः उकी छुं छुं फुति ग्लिसरिन ल्वाकछ्यानाः न्हिं न्हिं बहनी द्यनेत्ययेकाः म्हुतुसिइ इलेगु यानादिसँ । म्हुतुसि तसकं बांलानावइ ।
# गोलभ्यारा, चुकन्दर व तुसिया बराबर मात्राय् रस कयाः उकी छुं फुति कागतिया रस ल्वाकछ्यानाः मिश्रण दयेकादिसँ । थगु मिश्रणया प्रयोगं छ्यंगू नाइसे क्यातुसे च्वनी ।
# चिकुलाया मौसमय् छ्यंगू सुख्खा जुयाः फ्वफ्वः धायाच्वन धाःसा ग्लिसरिनय् गुलाबजलया छुं छुं मात्रा ल्वाकछ्यानाः फ्रिजय् वा ख्वाउँगु थासय् तयादिसँ । सुथय् व बहनी थ्व मिश्रण छ्यल धाःसा छ्यंगू बांलानावइ ।
# बागू कप कचिगु दुरु कयाः उकी चिधंगु चम्चां छगू चम्चा चि ल्वाकछ्यानाः सुथय् व बहनी छ्यलादिसँ । छ्यंगू बांलाना वइ ।
# सायागु अथवा च्वलेचिगु दुरुइ कागतिया छुं छुं फुति ल्वाकछ्यानाः बहनी द्यने न्ह्यः ल्हातं नाइक ख्वालय् बुलादिसँ, अले ख्वाः मसिसे द्यनादिसँ । सुथय् ख्वाउँलखं ख्वाः ब्वब्वस्यानाः सिलादिसँ । छुं न्हि लिपा ख्वाः तुइसे च्वनाः न्हाय्कं थें थिनावइ ।
# स्यःकै वंकेगु खःसा नीहः दायेकाःछानय् यानादिसँ । ख्वाउँलकि उकी स्वफुति प्यफुति कागतिया रस, श्रीखण्डचुं भचा व पँचा भचा ल्वाकछ्यानादिसँ । थुगु लेप ख्वालय् पानाः घौछि त्वःता तयादिसँ, वयां लिपा ख्वाउँलखं सिलादिसँ ।
# हथंया ख्वला लखय् फ्वयादिसँ । अनंलि व हे लःलिसे निनाः हथंया पेस्ट दयेकादिसँ । थ्व लेप पायेगु यानांतुं च्वन धाःसा ख्वालय् वयाच्वंगु भुजिंखि बुलुहुं मदयावनी ।
# तुसिया रस छगू चमचा, गाजरया रस छगू चम्चा, ताजा दुरु छगू चम्चा ल्वाकछ्यानाः थुगु मिश्रण ख्वालय् पायेगु यानां तुं च्वन धाःसा ख्वालय् वयाच्वंगु भुजिंखि सुचुक मदयावनी ।
# धौ व बेसन ल्वाकछ्यानाः लेप दयेकादिसँ । थुगु लेपयात म्वःल्हुइ स्वयां न्ह्यः म्हय् क्वलं बुइ थें बुलादिसँ । थुकिं छ्यंगूयात स्वस्थ यानातइ ।
# पाके जूगु केरा ख्वालय् व गःपतय् पानादिसँ । १५–२० मिनेट लिपा सिला छ्वयादिसँ । ख्वालय् व गःपतय् वयाच्वंगु दाग वनी, अले उगु थासय् फ्रेस खने दयावइ ।
# लैंया रस छगू चम्चा कयाः उकी छगू चम्चा मक्खन बांलाक ल्वाकछ्यानादिसँ । थुगु लेप छवाःया निक्वः ख्वालय् पानादिसँ । पानाः घौछि लिपा लुमुलुमु धाःगु लखं ख्वाः सिलादिसँ । थुकिं यानाः ख्वालय् ला हय्हय् कुनीमखु । म्ह छम्हं न्हिं न्हिं अथवा निन्हुइ स्वन्हुइ छक्वः मालिस यायेगु व लछिया छक्वः बांलाक मालिस यायेगु यानाच्वन धाःसा म्हय् याकनं ला हय्हय् कुनीमखु ।
# छगू चम्चा मस्र्यासोंप लखय् दायेकाः काढा दयेकादिसँ । ख्वाउँलकि उकी कस्ति ल्वाकछ्यानादिसँ । थुगु लेपयात ख्वालय् फेसप्याक थें तयाः १५ मिनेट लिपा ख्वाः सिलादिसँ । थुकिया नियमित प्रयोगं ला हय्हय् कुंगु चकनावनी ।
# चानाकेँ बहनी दुरुइ फ्वयादिसँ । सुथय् ल्वहंमाँय् निनाः भतिचा हलू, छगू चम्चा दुरुया क्रीम व छुं छुं फुति गुलाबजल ल्वाकछ्यानादिसँ । थ्व ख्वालय् क्वलं बुले थें बुयाच्वनेगु यानाच्वन धाःसा हाकुगु ख्वाः नं तुइतुइ धायावइ ।
# सन्तरासिया ख्वला किचलय् पानाः गंकाः नचुक निनादिसँ । थुगु चुं छगू चम्चा कयाः उकी छगू चम्चा बेसन, हलू भतिचा, छगू चम्चा दुरु व छुं छुं फुति कागतिया रस ल्वाकछ्यानादिसँ । ख्वालय् व गःपतय् थ्व क्वलं बुले थें बुलादिसँ । छ्यंगू यचुपिचु धायाः बांलानावइ ।
# गःपः बांलाकेगु खःसा म्वःल्हुइ स्वयां १० मिनेट न्ह्यः मेवाया पेस्ट बुलादिसँ ।
# न्हिं न्हिं कस्तिं ख्वालय् व म्हय् बुलाः बाघौ लिपा ख्वाउँलखं म्वःल्हुइगु यानाच्वन धाःसा छिगु सौन्दर्य न्ह्याब्लें ल्यनाच्वनी ।
समा नेवाः