अविश्वास दर्ता यायेत देउवा नं तयार !

येँ – प्रधानमन्त्री केपी ओली विरुद्ध अविश्वासया प्रस्ताव तयेगु निंतिं नेपाली कांग्रेस नं सकारात्मक जूगु खँ सीदुगु दु । विज्ञ सूत्रं धाः कथं कांग्रेसया आपालं नेतातय्सं प्रतिगमनया पलाः ल्ह्वंम्ह प्रम ओलीयात तिबः बी मजिउ धकाः दबाब बियाच्वंगु खःसा पार्टी सभापति शेरबहादुर देउवा नं आः वयाः ओली विरुद्ध मंकाः अविश्वासया प्रस्ताव तयेत तयार जुयादीगु खः ।

नेकपा दाहाल–नेपाल पुचः, कांग्रेस व जनता समाजवादी पार्टी (जसपा) प्रम ओली विरुद्ध मंकाः अविश्वास प्रस्ताव दर्ता यायेत सहमत जुइधुंकूगु दु ।

नेपाली कांग्रेस दुने विशेषतः पार्टीया ल्याय्म्ह कार्यकर्तातय्सं सुयागु विरुद्ध संघर्ष याःगु खः वहे व्यक्तिलिसे सरकार दयेकेत सहकार्य यायेगु उचित जुइ मखु धासें पार्टी सभापति देउवायात कन्भिन्स याःगुलिं देउवा नं मंकाः कथं अविश्वासया प्रस्ताव दर्ता यायेत तयार जूगु खः ।
थ्व स्वयां न्ह्यः सभापति देउवां नेकपा विभाजन मजुइकं गुगुं नं पक्षय् थःपिं मवनेगु धयाच्वंगु खःसा आः स्वंगू पार्टी दुने न्ह्यानाच्वंगु सहलह लिपा ओली विरुद्ध अविश्वास प्रस्ताव दर्ता यायेत वय्कः तयार जूगु खः ।

सम्बन्धित बुखँ

LEAVE YOUR COMMENTS