निर्वाचन आयोग नं फैसलापाखे

येँ – विभाजित निगू नेपाल कम्युनिष्ट पार्टी मध्ये गुकियात आधिकारिक मान्यता बीगु धकाः निर्णय याये मफयाच्वंगु निर्वाचन आयोग आः फयांफछि याकनं निर्णय बीत बाध्य जूगु दु ।

‘नेपाल कम्युनिष्ट पार्टी’ धइगु नांयात कयाः ऋषि कट्टेलं तयातःगु रिटय् सर्वोच्च अदालतं गज्याःगु फैसला बी धकाः निर्वाचन आयोग पियाच्वंगु खः । सर्वोच्चं म्हिगः थुकिया फैसला न्यंकेगु अनुमान जुयाच्वंगु खः । तर पुलांम्ह प्रधानन्यायाधीश सुरेन्द्रप्रसाद सिंह सीगु कारणं शोक माने यायेत म्हिगः अदालत बन्द जुइवं उकिया फैसला मवल ।

आः सर्वोच्चं मेगु दँया वैशाखपाखे जक थुकिया फैसला न्यंकेफुगु खँ धाःगु दु । अदालतं यदि ऋषि कट्टेलया पक्षय् फैसला न्यंकल धाःसा नेकपा स्वतः पुलांगु हे ‘एमाले’ व ‘माओवादी केन्द्र’ य् रुपान्तरित जू वनीगु जूगुलिं निर्वाचन आयोगयात आराम जूवनीगु खः । उगु फैसलायात कांग्रेसं नं पियाच्वंगु खः । तर म्हिगः थ्व फैसला मवयेसातकि आः कांग्रेसं नं थःगु कथंया निर्णय याये मालीग अवस्था वःगु दु । मेखे निर्वाचन आयोगं यदि फैसला बीमाःगु अवस्था वल धाःसा गुखे बहुमत केन्द्रीय सदस्य दु वयात हे आधिकारिक मान्यता बीगु मनःस्थिति दयेकाच्वंगु खँ नं सूत्रं धाःगु दु ।

सम्बन्धित बुखँ

LEAVE YOUR COMMENTS