उद्योग व्यवसायीतय्त न्हूगु मिटर कायेत सहज

येँ- नेपाल विद्युत प्राधिकरणं उद्योगीतय्सं नियमित रुपं व्यवसाय संचालन यायेफयेमा धकाः न्हूगु मिटर कायेगु निंतिं सहज व्यवस्था याइगु जूगु दु । प्राधिकरणं प्रशारण व वितरण प्रणाली सुधार यानाः नियमित विद्युत आपूर्तिया व्यवस्था याइगु खँ धाःगु दु ।

प्राधिकरणया वितरण व ग्राहक सेवा निर्देशनालयं बिहीवाः छगू सूचं पिथंसें नियमित विद्युत आपूर्तिया व्यवस्था यायेत न्ह्यागु नं भोल्टेज लेभलया न्हूगु व थप लोड कायेत चाहेजूपिं उद्योगी व्यवसायीतय् न्हय्न्हुया दुने आवेदन बीत आव्हान याःगु दु ।

निर्देशनालयं उद्योगाया नां, थाय्बाय्, माग यानागु लोड, एमभिए व भोल्टेज, केभी नापं सम्बन्धित प्राधिकरणया स्थानिय ज्याकू (वितरण केन्द्र)या नां न्ह्यथनाः आवेदन बीत इनाप याःगु दु । अथेहे सप्लाई कनेक्सन माःगु मिति व उद्योगया पूर्वाधार निर्माणया अवस्था नापं क्वचाइगु मिति नं आवेदनय् न्ह्यथनेत इनाप याःगु दु ।