मोदीयात नेवाः भासं लसकुस, मूल अभिनन्दन पत्रय् रञ्जना लिपिया प्रयोग

येँ – नेपाः भ्रमणय् झाःम्ह भारतीय प्रधानमन्त्री नरेन्द्र मोदीयात म्हिगः येँ महानगरपालिकां याःगु नागरिक अभिनन्दन ज्याझ्वलय् नेपालभाषा व नेपाल संवत् नं छ्यलेगु ज्या जुल ।

भारतीय प्रम मोदीयात लःल्हाःगु मूल अभिनन्दन पत्रय् ‘अभिनन्दन पत्र’ धइगु मूल आखः हे रञ्जना लिपिं च्वया तःगु खः । अथे हे उगु अभिनन्दन पत्रय् इस्वी संवत्, विक्रम संवत्या नापनापं नेपाल संवत् नं छ्यलातःगु खः । अन इना बिउगु अभिनन्दनपौया व्यहोरा दुगु सफूचाय् उकिया नेपालभाषां अनुवाद नं दुथ्याकातःगु दु ।

अभिनन्दन पौ देछायेत सम्बोधन यानादीम्ह येँ मनपाया मेयर विद्यासुन्दर शाक्यं थःगु भाषणया छकूचा ब्व नेपालभाषां नं न्ववानादीगु खः । वय्कलं भारतीय प्रधानमन्त्री नरेन्द्र मोदीयात ऐतिहासिक नगर येँय् लसकुस याना धकाः भाजु मोदीया मांभाय् गुजराती, अंग्रेजी व नेपालभाषां न्ववायेधुंकाः तिनि खस नेपाली भासं सम्बोधन शुरु यानादीगु खः । राष्ट्रिय सभागृहया दबुली तयातःगु मूल ब्यानरय् नं ‘गणतन्त्र भारतया महामहिम प्रधानमन्त्री नरेन्द्र मोदीयात लसकुस’ धकाः नेवाः भासं च्वयातःगु खः ।

अथे हे राष्ट्रिय सभागृहया मूल गेटया च्वय् नं ‘नेपाः–भारत स्वापू सदां न्ह्यानावं वनेमा’ धकाः नेवाः भासं च्वयातःगु खःसा उकिया अतिरिक्त अन अंगः, पःखालय् तयातःगु पोष्टरय् नं नेवाः भाय् छ्यलातःगु खः ।

भारतीय प्रधानमन्त्री नरेन्द्र मोदीं नं थःगु सम्बोधनया झ्वलय् येँदेय्या आपालं तारिफ यानादिल । लिसें येँ देय्या नेवाःतय्सं न्यायेकीगु स्वन्ति नखतय् हिन्दू व बौद्ध संस्कृतिया मिश्रण दुगु खँ कनादिल ।

वय्कलं येँ देय् जक मखु यल, ख्वप व किपूया समेत नां कयाः थ्व लागा धार्मिक, सांस्कृतिक व कलाया ल्याखं नं तसकं च्वन्ह्याःगु बिचाः प्वंकादिल । वय्कलं धयादिल, ‘येँ नेपाःया राजधानी जक मखु, थःगु हे कथंया विशेषता दुगु विशिष्ट नगर नं खः ।’

जनकपुरय् हिन्दी अप्वः
भारतीय प्रधानमन्त्री मोदीयात जनकपुरय् याःगु अभिनन्दनय् खस नेपाली बाहेक हिन्दी व मैथिली भाषा नं प्रयोग जूगु खः । वय्कःयात अन मैथिलीं च्वयातःगु अभिनन्दन पौ ब्वनाः न्यंकूगु खः । तर समारोह सञ्चालनया अप्वः भाषा धाःसा हिन्दी जूगु खः । नापं प्रम मोदीयात लसकुस यायेत थाय्थासय् तयातःगु ब्यानरय् नं हिन्दी भाषाया यक्व प्रयोग यानातःगु खः । खस नेपाली, मैथिली व अंग्रेजी यानाः स्वंगू तक भाषा प्रयोग याःसां गाःगुली हिन्दी नं छ्यःगु खँय् आलोचना जूगु खः ।