समस्या ः अनिच्छित गर्भधारणया

२१ औंं शताब्दीया इलय् नं परिवार नियोजनया साधनया पहुँच मदुगुलिं हे नेपाःया ४५ प्रतिशत मिसा अनिच्छित गर्भाधारण यायेत बाध्य जुयाच्वंगु दु । गुट्माकर इन्ष्टिच्युट, वातावरण स्वास्थ्य व जनसंख्या कार्यक्रम अनुसन्धान केन्द्र (कृपां) याःगु छगू अध्ययन प्रतिवेदनकथं नेपालय् तःधंगु ल्याखय् मिसातसें अज्याःगु साधनया पहुँचया अभावया कारणं अनिच्छित गर्भाधारण यायेत बाध्य जुयाच्वंगु खः ।

सन् २०१७ य् याःगु अध्ययनं नेपालय् हरेक दँय् १२ गू लाख मिसा प्वाथय् दयाच्वंगु न्ह्यथँसें उकीमध्ये न्यागू लाख स्वीगुद्वलं अनिच्छित गर्भाधारण यायेगु यानाच्वंगु थन जूगु छगू ज्याझ्वःया दथुइ सार्वजनिक याःगु तथ्यांकय् न्ह्यथनातःगु दु ।

अनिच्छित गर्भमध्य् करिब प्यब्वय् छब्व अनियोजित जन्म जुइगु व स्वब्वय् निब्व गर्भपतन जुइगु यानाच्वंगु दुसा ल्यं दुगु गर्भ नं अथें हे कुहां वयाः सितिं वनाच्वंगु कृपाया सहनिर्देशक डा. महेश पुरीं कनादिल ।

वय्कःयाकथं गर्भाधारण यायेत इच्छुक मदुपिं १५ निसें ४९ दँतकया उमेर समूहया मिसामध्ये ४४ प्रतिशत परिवार नियोजनया आधुनिक साधनया चाहना दयेकदयेकं नं सहज पहुँच मदुगुलिं इमिसं कि त साधन हे नाला काइमखु कि त परिवार नियोजनया परम्परागत विधि नालेगु यानाच्वंगु दु ।

नेपाःया न्हय्गुलिं प्रदेशय् परिवार नियोजनया साधन मागकथं पर्याप्त जुइ मफुगु खँ न्ह्यथँसें वय्कलं गण्डकी प्रदेशय् दकलय् अप्वः ५२ व प्रदेश नं. २ लय् दकलय् म्हो ३८ प्रतिशत माग दुगु अध्ययनया क्रमय् लुया वःगु दु । नेपाःया अप्वःथें प्वाथय् दुपिं मिसां प्वाथय् दुगु अवस्थाय् व मचा बुइके धुंकाःया अवस्थाय् वये फइगु स्वास्थ्य समस्यापाखें बचे जुइत व उकिया व्यवस्थापन यायेत आवश्यक जुइगु सेवाः प्राप्त याये मफयाच्वंगु वय्कःया धापू दु ।

तथ्यांककथं ६४ प्रतिशत प्वाथय् दुपिं मिसातय्सं म्होतिं नं प्यक्वःतक गर्भ जांच यानागु व ६१ प्रतिशतं तालिम प्राप्थ स्वास्थ्यकर्मिया ग्वाहालि मचा बुइकेगु यानाच्वंगु सीदुगु दु । पुरीयाकथं प्वाथय् दुगु व मचा बूगु अवस्थाय् जुइगु स्वास्थ्य जटिलता जूपिं मिसातमध्ये २७ प्रतिशतं जक मां व नकथिनि बूम्ह ह्याउँमचां आवश्यक स्वास्थ्य सेवा कायेगु यानाच्वंगु दु ।

सन् २०१६या अनुमानित मातृ मृत्युदर प्रत्येक छगू लाख जीवित जन्मय् २३९ मातृमृत्यु दर दुगु न्ह्यथँसें तथ्यांकय् गुगु दक्षिण एशिया क्षेत्रया औसत स्वयां अप्वः दछिया १६०० या ल्याखय् थ्यनाच्वंगु दु । नेपालय् मिसातय् मागकथं परिवार नियोजनया आधुनिक साधनया आवश्यकता करिब दछिया छगू करोड ७० गू लाख अमेरिकी डलरं अप्वया वनाः स्वंगू करोड डलर खर्च जुइगु यानाच्वंगु नं तथ्यांकय् न्ह्यथनातःगु दु ।

परिवार नियोजनया सेवाय् हिउपाः महयेगु खः धइएगु जूसा १२ गू लाख प्वाथय् दुपिं मिसायात दँय्दसं मातृत्व व ह्याउँमचायात स्वास्थ्य सेवाया प्याकेज प्रदान यायेत १३ गू करोड १० गू लाख अमेरिकी डलरया आवश्यक जू वइ, गुकिया प्यब्वय् छब्व लागतं मिसाया अनिच्छित गर्भाधारणया अवस्थाया सुसाःकुसाःया लागत पूरा याइ ।

परिवार नियोजनया आवश्यक सेवाया चाहना पूरा यायेत खः धइगु जूसा अनिच्छित गर्भधारण ८७ प्रतिशत वा प्यंगू लाख चय्गुद्वलं कुहां वइ व वहे अनुपातय् अनियोजित गर्भपतन व थःहे मचा कुहां वइगु गर्भ नं म्हो जुइगु खनेदु । परिवार नियोजनया साधनत दक्वंया आवश्यकता पुरा जुल धाःसा दछिया स्वसः मातृमृत्युर दरयात नं क्वकाये फइगु अध्ययनं क्यंगु दु ।

मातृत्व व ह्याउँमचाया स्वास्थ्य सेवा पूरा याये फत धाःसा मृत्युदरयात नं क्वयकाये फइगु सार्वजनिक याःगु प्रतिवेदनय् न्ह्यथनातःगु दु ।
नेपाल परिवार नियोजन संघ कास्की शाखाया अध्यक्ष निरञ्जन श्रेष्ठया कथं कास्की जिल्लाय् परिवार नियोजनया न्यागुलिं प्रकारया साधन उपलब्ध याका वयाच्वंगु दु ।

सहरी क्षेत्रय् स्वयां नं विकट क्षेत्रय् परिवार नियोजनया शिक्षा व साधनया पहुँच थ्यने मफुगु धासें वय्कलं जनेचतना अभिवृद्धिया लिसें आगामि ज्याझ्वः ग्रामिण क्षेत्र लक्षित जुइमाःगु खँय् बः बियादिल । गैर सरकारी संस्था महासंघया महासचिव रामप्रसाद सुवेदीं सरकारं परिवार नियोजनया क्षेत्रय् लगानी अप्वयेका यंकाः विकटया बस्तीया जनतायाथाय् तक थ्यंकेमाःगु खँय् बः बियादिसें उकिया निंतिं स्थानीय सरकार व गैससया भूमिका महत्वपूर्ण जुइगु खँ न्ह्यथनादिल ।

लिंगया आधारय् याइगु भ्रुण हत्यायात निरुत्साहित यायेमाःगु खँय् बः बियादिसें वय्कलं उकिया कारणं मिसातय् स्वास्थ्यय् न्हियान्हिथं जोखिम अप्वया वनाच्वंगुयालिसें तःधंगु मात्राय् धनराशी नं खर्च जुइगु यानाच्वंगु धयादिल । परिवार नियोजनया अत्याधुनिक साधनया मागयात परिपूर्ति यायेत संघ, प्रदेश व स्थानीय तहलिसें निजी ख्यलं नं अन्तर्राष्ट्रिय विकास साझेदार संस्थाया दथुइ मंकाः कुतः यायेमाःगु आवश्यक खनेदु ।

सम्बन्धित बुखँ

LEAVE YOUR COMMENTS