प्रधानसेनापति सर्वोच्चय् छाय् ? सर्वोच्चया फैसला लिपा अनपेक्षित घटना जुइ फइगु आशंका

येँ – नेपाली सेनाया प्रधान सेनापति पूर्णचन्द्र थापां म्हिगः सर्वोच्च अदालतया प्रधानन्यायाधीश चोलेन्द्र शम्शेर जबरायात नापलायेवं थीथी कथंया न्ह्यसः ब्वलंगु दु । प्रधानमन्त्री केपी ओलीं संसद विघटन याःगु मुद्दाया फैसला वयेत्यंगु इलय् निगू संवैधानिक निकायया प्रमुखत नापलाःगुलिं उकथं न्ह्यसः ब्वलंगु खः ।

संसद विघटनया रिटय् थःथःगु पक्षय् निर्णय वयेमाः धकाः राजनीतिक नेतातय्गु दबाबय् लानाच्वंगु सर्वोच्च अदालतया प्रधानन्यायाधीश सेनापति थापा दथुइ सर्वोच्चया निर्णय लिपा ब्वलने फइगु परिस्थितियात कयाः सहलह जूगु खँ सूत्रं धाःगु दु ।

प्रधानन्यायाधीश राणा व प्रधानसेनापति थापाया दथुइ निता खँय् सहलह जूगु खँ सूत्रं धाःगु दु । सूत्रया कथं वय्कःपिनि दथुइ संसद विघटन सदर वा बदर न्ह्यागु जूसां वयां लिपा वये फइगु प्रतिकूल परिस्थितिया सामना गुकथं यायेगु धकाः व निम्हं प्रमुखत विवादपाखें गुकथं तापायेफइ धकाः सहलह जूगु खः ।

प्रधानन्यायाधीश व प्रधानसेनापतिया थ्व भेटयात सेनां नियमित ज्याझ्वः खः धाःगु दु । सेनाया प्रवक्ता सहायक रथी सन्तोषबल्लभ पौड्यालं सर्वोच्च अदालतया लिउने नेपाली सेनां भोगचलन यानाच्वंगु ९ रोपनी जग्गा बारे खँ ल्हायेत प्रधानसेनापति थापा सर्वोच्च अदालत झाःगु खँ कनादीगु दु ।

राजनीतिक विश्लेषक राजेन्द्र महर्जनं धाःसा वय्कःपिनि थ्व भेट स्वाभाविक मजूगु खँ धयादीगु दु । ‘नेपालभाषा टाइम्स’ लिसे खँ ल्हासें वय्कलं धयादिल, ‘थ्व संयोग जक पक्का मखु, आवश्यकता नं मखु । जग्गाया विवाद खःसा सेनाया छम्ह कर्मचारी जक छ्वःया नं ज्यंके जिउ । सेनापति हे सर्वोच्चय् वनाः प्रधानन्यायाधीशयात नापलायेगु गुगु ज्या जूगु दु, थुकिं छगू दिशा क्यंगु दु ।’

सेनां धाःसा सर्वोच्च अदालतं दयेकाच्वंगु भवनय् थःपिनिगु नं जग्गा लानाच्वंगु धासें उगु विवाद ज्यंकेगु निंतिं हे सेनापति प्रधानन्यायाधीश नापलायेत वंगु खँ धाःगु दु ।

तर राजनीतिक विश्लेषण महर्जनं नेपाःया वर्तमान राजनीतिक विवादय् सेनाया तःधंगु चिउताः दुगु खँ कँसें सेनां लोकतान्त्रिक इलय् नं स्वायत्त जुइ चाहे जुयाच्वंगुलिं प्रधानन्यायाधीश नापलाःवंगु बिचाः तयादिल ।

वय्कलं प्रधानसेनापतिं प्रधानन्यायाधीश नापलायेगु छुं नं कथंया नियमित प्रक्रिया मखु धासें थौं गज्याःगु इलय् वय्कःपिं नापलानाच्वन धइगु महत्वपूर्ण खँ खः धयादिल ।

वय्कलं न्ह्यःने धयादी, ‘आःया स्थितिइ सेनाया नं ध्यान वनाच्वंगु दु, अथे जुयाः टाइम एण्ड स्पेश छु खः धइगु बारे थुइकेमाःगु आवश्यकता ब्वलनाच्वंगु दु ।’

सम्बन्धित बुखँ

LEAVE YOUR COMMENTS