स्वनिगःया छेँथुवाःत मभिं क्यनेगु प्रवृत्ति !

येँ – थौंकन्हय् स्वनिगलय् बालं तयातःपिं छेँथुवाःतय्सं बालं च्वनीपिंत दना हुँ जक धाःसां नं अन्याय–अत्याचार यात धकाः द्वपं बीगु छगू न्हूगु प्रवृत्ति शुरु जुया वःगु दु । बालं च्वंपिनिगु छुं हे दोष मस्वसे छेँथुवाःत जक दोषी खनीगु थ्व प्रवृत्तिं यानाः यक्व छेँथुवाःतय्सं बेइज्जती फये मालाच्वंगु दु । थज्याःगु ज्याय् खास यानाः पिनें वयाच्वंपिंसं सञ्चालन याइगु सञ्चार माध्यमतय्सं नं न्ह्याबलें छेँथुवाःत हे जक दोषी क्यनाः समाचार सम्प्रेषण यानाच्वंगु खनेदु । थ्व झ्वलय् येँया छम्ह रैथाने पत्रकार हे थज्याःगु कथंया गलत प्रवृत्तिया शिकार जूगु दु ।
नेपालभाषाया कार्यकर्ता लिसें नांजाःम्ह पत्रकार हिमेश वज्राचार्य थज्याःगु हे प्रवृत्तिया शिकार जूगु खः ।

थःगु छेँय् बालं च्वनाच्वंम्हेसित दना हुँ धाल धकाः योहो टेलिभिजनं बालं च्वंपिनिगु सामान वांछ्वयाः जबर्जस्ति थनाछ्वल धकाः भ्रामक समाचार बिउगु दु । योहो टेलिभिजनया छगू ज्याझ्वलय् प्रस्तुतकर्तां स्वनिगःया छेँथुवाःत निर्दयी जुयाच्वंगु धासें छम्ह जिम्मेवार पत्रकार, नागरिकया मानमर्दन याःगु खः ।

योहोया समाचारय् दछि न्ह्यवंनिसें वज्राचार्यया छेँय् बालं च्वनाच्वंम्ह ललिता श्रेष्ठया सामान पिने वांछ्वयाः क्वथां पितिनाहःगु धकाः क्यंगु खः । थ्व घटनाय् पीडित धाःसा ललिताया काय प्रज्वल श्रेष्ठया जक एकपक्षीय धापू क्यनातःगु दुसा छेँथुवाःया धापू कायेगु तकं कुतः मयाः । जबकि थज्याःगु समाचारय् निगुलिं पक्षया खँ तयेमाःगु खः ।

छेँथुवाः वज्राचार्यया कथं ताःई तक नं ध्यबा मपूगुलिं स्वला न्ह्यवंनिसें श्रेष्ठयात क्वथा त्वःता वनेत धयातयागु व क्वथा त्वःतूकुन्हु उपिं थःपिंसं हे सामान पिने हयाः तयातःगु खः । थःपिंसं हे सामान पिने हयाः लिपा टिभीयात सःताः थज्याःगु कर्तूत याःगु खँ वज्राचार्यं कनादीगु दु ।

जनसेवा प्रहरीया डिएसपी दानबहादुर मल्लं तकं थ्व घटनाय् बालं च्वनाच्वंम्हेसिया यक्व कमजोरी दुगु खँ धयादीगु दु । ‘घटना लिपा प्रहरी छ्वयाः न्यनेकने यानाबलय् बालं च्वंम्हेसिया यक्व कमजोरी दुगु खनेदत’ वय्कलं धयादिल ।

अथेहे २४ वडाया वडासदस्य सुमन स्थापितं बालं च्वनाच्वंपिंसं ताःई तकं ध्यबा मपूगुलिं जनसेवा वनाः लिपा ध्यबा पुला बीगु धकाः भ्वं यानातःगु खँ न्ह्यथँसें धयादीगु दु, ‘लिपा ध्यबा पुलेगु भ्वं यानातःम्हेसित क्वथा त्वःता हुँ धयां छुं गल्ती जुल ?’ अथेहे वय्कलं नं बालं च्वनाच्वंपिंसं थःपिंसं हे क्वथा त्वःतेत सामान पिने तयाः लिपा थःपिनिगु सामान वांछ्वया बिल धकाः आरोप बिउगु खँ धयादीगु दु ।
‘स्वनिगः पिनें वःपिंसं स्वनिगःया स्थानीयत मभिं छँेथुवाःत मभिं धकाः क्यनेगु कुतः यानाच्वंगु दु । थज्याःगु हे कुतःया शिकार हिमेश जुल’ स्थानीयवासी सुजन विलास वज्राचार्यं धयादिल ।

सम्बन्धित बुखँ

LEAVE YOUR COMMENTS