जसपाया भिंतुना कालबिल

येँ(नेपालभाषा टाइम्स)- जनता समाजवादी पार्टी (जसपा) नेपाल तारकेश्वर नगरपालिका ३ वडाया ग्वसालय् विक्रम संवत् २०८० न्हूदँया लसताय् भिंतुना कालबिल ज्याझ्वः जुल । जसपा नेपाल प्रतिनिधिसभा येँ निर्वाचन क्षेत्र नं ७ समन्वय समितिया संयोजनय् तारकेश्वरया तीनपिप्लेय् उगु ज्याझ्वः जूगु खः ।

पार्टीया केन्द्रीय दुजःलिसें पुलांम्ह मन्त्री राजेन्द्रप्रसाद श्रेष्ठ मूपाहाकथं झायादीग ज्याझ्वलय् पार्टी पोलिट ब्यूरो दुजःपिं बम दर्लामी मगर, राजन केसी, तारकेश्वर नपा ३ वडाअध्यक्ष परशुराम अर्याल, स्थानीय समाजसेवी उमाप्रसाद अर्याल िविशेष पाहां व पार्टीया केन्द्रीय दुजः सोनाम लामा शाक्य, विमला अर्याल पुतुवार, बागमति प्रदेश अध्यक्ष सुमन महर्जन, उपाध्यक्ष लक्ष्मी थापा, मुख्य सचिव ईश्वरी रावत, नेवाः राष्ट्रिय समितिया अध्यक्ष श्यामकृष्ण प्रजापति, जिल्ला अध्यक्ष अजित पुतुवारपिं पाहांकथं झायादीगु खः। ं

उगु इलय् मूपाहां पूर्वमन्त्री श्रेष्ठ, ३ वडाअध्यक्ष अर्याल व स्थानीय समाजसेवी अर्यालं मंकाःकथं तारकेश्वर धितालचोकया यो गाउँ–तीनपिप्लेया सतक स्तरोन्नतिया शिलान्यास यानादीगु खः ।

उगु सतक स्तरोन्नतिया निंतिं श्रेष्ठ संघीय मामिला तथा सामान्य प्रशासनमन्त्री जुयाच्वनादीगु इलय् मन्त्रालय अन्तर्गतया स्थानीय पूर्वाधार विभागया ‘ग्रामिण सडक संजाल सुधार आयोजना’पाखें जुइकथं छगू करोड बजेट विनियोजन यानादीगु खः ।

थुकथं हे वय्कःपिंसं मंकाःकथं तारकेश्वर ३ या हे ठूलो खोला न्यागःमणि फेदीया लँपु नं स्तरोन्नतिया निंतिं शिलान्यास यानादीगु दु । कसरा कन्स्ट्रक्सनं ठेक्का काःगु सतक स्तरोन्नति लिपा थप निर्माणया निंतिं नं थम्हं पहल यायेगु मन्त्री श्रेष्ठं धयादीगु दु ।

वय्कलं ताः ई न्ह्यवंनिसें जीर्ण जुयाच्वंगु तारकेश्वरया मुड्कोनिसें तीनपिप्लेतकया लँ थः मन्त्री जुयाच्वनागु इलय् ठेक्का कयाः ज्या मयाःगु ठेकेदार कम्पनीया सम्झौता रद्द याके बियागु व लिपा मेम्ह मन्त्री वयेधुंकाः उगु लागाया स्थलगत निरीक्षण यानाः प्यलाया दुने लँ दयेकाबीगु बचं बियागु खँ कनादिसें थम्हं धयागु ईया दुने लँ दयेकेगु ज्या जूगु खँ कनादिल ।

थ्व हे झ्वलय् वय्कः मन्त्री जुयाच्वनादीगु इलय् तारकेश्वरया देवीस्थाननिसें कोटतक वनेगु १४५ मिटरया यातायाता ताँया निंतिं नं बजेट विनियोजन यानागु व आः वयाः निर्माणया ज्या शुरु जुइत्यंगु जानकारी नं बियादिल ।