डेक्सामेथासोन : आशा ब्वलंगु दु, ढुक्क जुइगु अवस्था मवःनि

कोरोनाया वासः लूगु दावी

येँ – कोराना भाइसरया संक्रमण गम्भीर कथं विरामी जूपिनिगु निंतिं जीवन रक्षा यायेत ग्वाहालि यायेफइगु वासः लूगु खँ पिहां वःगु दु। बेलायती चिकित्सकतय्सं डेक्सामेथासोन नांया वासलं गम्भीर कथंया विरामीतय् उपचारय् सकारात्मक लिच्वः लाकूगु दावी याःगु दु। डेक्सामेथासोन वासः न्हापां निसें हे निमोनिया, निश्चित ताजिया बाथ ल्वय्, ब्याक्टेरीयल मेनेन्जाइटिसया उपचारय् छ्यला वयाच्वंगु वासः खः ।

थ्व वासः कोरोनाया उपचारय् नं सकारात्मक लिच्वः लाकूगु चर्चा जुयाच्वंगु इलय् नेपालय् थुकिया छ्यलाबुलाया सम्भावनाया बारे नं चर्चा सुरु जूगु दु। तर चिकित्सकतय्सं बेलायतय् जूगु अनुसन्धानं छुं आशा ब्वलंसां वासः हे लुत धकाः धुक्क जुइगु अवस्था मवःनिगु खँ धाःगु दु। श्वासप्रश्वास सम्बन्धी विशेषज्ञ डा. अर्जुन कार्की बिबिसी नेपाली सेवा लिसे खँ ल्हासें धयादीगु दु, ‘छुं भचा आशा ला ब्वलंगु दु, तर गुलिखे ल्वय्या गम्भीर ल्वगियात जक थ्व वासलं ज्या याइगु जूगुलिं कोभिड-१९ जुल धायेवं थ्व सकसिनं छ्यले जिउगु वासः मखु।’

वय्कलं थुकिया अध्ययनया लिच्वः पूवंक पिहां मवयेकं नेपालय् अथें छ्यलेमजिउगु खँ नं धयादीगु दु। ‘विश्व स्वास्थ्य संगठन व अमेरिकाया सेन्टर्स फर डिजिज कन्ट्राेल एन्ड प्रिभेन्सनं थ्व वासःया बारे छुं न्ववाःगु मदुनि । अले छगू थासय् खनेदुगु प्रारम्भिक लिच्वःयात स्वयाः दक्वथासय्छ्य लेजिउ धाये नं मजिउ । उकिं छुं ई पिइगु हे बुद्धिमानी जुइ’ वय्कलं धयादीगु दु ।

अथेहे शिक्षण अस्पताल महाराजगञ्जया छाती ल्वय्या विशेषज्ञ व कोभिड व्यवस्था समितिया संयोजक डा. शान्तकुमार दासं डेक्सामेथासोन ढुक्क जुयाः छ्यले जिउगु वासः मखु धासें धयादीगु दु, ‘कोभिड १९ पाखें वःगु ज्वरो मखुत धाःसा थुकिया छ्यलाबुला खतरनाक नं जुइफु ।’ थ्व वासलं चिनि ल्वय्, ब्लड प्रेसर व मेमेगु ब्याक्टेरियल संक्रमण जुयाच्वंपिंत थ्व वासलं झन समस्या अप्वयेका बीफु धासें थुकिं अल्सर नं जुइकेफुगु खँ धयादीगु दु। अथेहे थ्व वासलं ल्वय् लिसे ल्वायेगु क्षमतायात नं कमजोर यानाबीफुगु खँ धाःगु दु ।

चिकित्सकतय् कथं डेक्सामेथासोन स्टेरोइडय् आधारित छगू कथंया वासः खः, गुगु थीथी ल्वय्या उपचारय् छ्यलाबुला याना वयाच्वंगु दु। डा. कार्कीया कथं ल्वगिया फुक्कं पक्षया विश्लेषण यानाः जक विशेषज्ञ चिकित्सकं आइसीयु उपचार कक्षय् थ्व वासः बीगु जूगुलिं मेपिंसं थ्व वासः अथें छ्यलेमजिउ ।

निमोनिया ल्वचय् थ्व वासलं विरामीयात यक्व ग्वाहालि याःगु खँ धासें डा. दासं थुकिं निमोनिया पाखें जुइगु मृत्युदर म्हो याःगु व ल्वगियात भेन्टिलेटरय् तयेमाःगु अवस्थायात नं म्हो याःगु खँ धयादीगु दु ।

यदि बेलायती चिकित्सकतय् अनुसन्धान कथं डेक्सामेथासोनं ज्या याइगु जुल धाःसा थ्व वासः कोरोनालिसे ल्वायेगु निंतिं यक्व खर्च म्वाःगु दंगु हतियार धाःसा जुइफु । थ्व वासः नेपालय् नं उत्पादन जुइगु याःसा भारतं नं आयात यायेगु यानाच्वंगु दु ।

 

सम्बन्धित बुखँ

LEAVE YOUR COMMENTS