न्हूगु पुस्तायात कला संस्कृति स्यनेज्याय् नेवाः समुदायया न्ह्यलुवाःत

नवलपरासी (रासस)- थन बर्दघाट सुस्ता लिक्क लाःगु कावासोतिया नेवाः समुदायं थःगु परम्परागत कला व संस्कृति न्हूगु पुस्तायात स्यनेगु ज्या न्ह्याकूगु दु । थनया न्ह्यलुवाःपिंसं तालिम संचालन
यानाः समुदायया संस्कृति व कलाया बारे न्हू पुस्तायात स्यना वयाच्वंगु दु ।

सीका नेवाः गुथिया नायः रामचन्द्र श्रेष्ठया कथं मस्त व ल्याय्म्हतय्के कला व संस्कृति बारे चेतना ब्वलंकेत गुथिं लाखे प्याखं, धिमेबाजं, मादल व झ्यालि संरक्षण अभियान न्ह्याकूगु दु । लाखे प्याखं, धिमेबाजं नेवाः समुदायया परम्परागत सांस्कृतिक महत्व नाप स्वानाच्वंगु दु, तर न्हूगु पुस्तां आधुनिकता नापं थज्याःगु संस्कृति ल्वःमंकेगु यानाहःगुलिं संरक्षण अभियान न्ह्याकूगु दु ।

सीका नेवाः गुथिं नेवाः कला, संस्कृति व सीप ल्यंकेत वंगु दँय् लत्यायंकं धिमे बाजं स्येनज्या न्ह्याकूगु खः । अध्यक्ष श्रेष्ठं वंगु दँया प्रशिक्षणं सकारात्मक लिच्वः लाःगुलिं थुगुसी नं लाखे प्याखं सहितया प्रशिक्षण न्ह्याकूगु जानकारी बियादिल । वय्कलं धयादिल, “सापारुबलय् थायेगु धिमेबाजं, मादल, झ्यालीया व्यावहारिक प्रशिक्षण न्हूगु पुस्तायात बियाच्वनागु दु, पुलांगु पुस्तां बुलुहुं लःल्हानाच्वनागु दु ।’

गुथिया सल्लाहकार झकनारायण श्रेष्ठं मस्तय्सं बाजं व परम्परागत प्याखंया शीप सयेकेबलय् याकनं सयेकी, उकिं न्हू पुस्तापाखें परम्परा संरक्षण अभियान न्ह्याकूगु खँ कनादिल ।