भारतया न्हूगु नक्साय् काली खुसि नं गायब

येँ – अतिक्रमित नेपाःया भूमियात थःगु राजनीतिक नक्साय् क्यंगु भारतं हाकनं न्हूगु नक्सा जारी याःगु दु । तर न्हूगु नक्साय् नं न्हापा अतिक्रमण यानातःगु भूमि त्वःतेगु पलेसा नेपाः–भारत सीमाय्लाःगु काली खुसि हे मदयेका बिउगु दु । सर्वे अफ इन्डियां जारी याःगु गुक्वःगु संस्करणया नक्साय् काली खुसि गायब यानातःगु खः ।

थ्व स्वयां न्ह्यः जारी याःगु च्याक्वःगु संस्करणय् काली खुसि स्पष्ट रुपं क्यनातःगु खः । न्हापा जारी याःगु च्याक्वःगु संस्करणया कारणं नेपालय् आन्दोलन जूगु खःसा नेपाः सरकारं नं भारतीय नक्सा अस्वीकार्य जूगु धासें अनं सेना लित यंकेमाः धाःगु खः । भारतं थःगु राजनीतिक नक्साया च्यागूगु संस्करण जारी याःगु छुं न्हि लिपा हे गुंगूगु संस्करण पिकाःगु खः ।

१८१६ स जूगु सुगौली सन्धीया धारा ५ कथं काली खुसि हे नेपाः व भारतया सिमाना खः । कालीया वारी नावी, गुन्जी व गब्याङ गां नेपालय् लाः । उगु क्षेत्रया जनतायात नेपालय् हे कर पु धकाः गढवाल कार्यालयं पौ च्वःगु ख ः। वि.सं. २०१८ सालय् स्वंगुलिं गामय् नेपालं जनगणना याःगु खः । उकिं नं काली हे सिमाना खः धइगु क्यं ।

तर भारतं ताः ई न्ह्यवंनिसें अतिक्रमण याना वयाच्वंगु कालीयात धाःसा थःगु नक्साय् मक्यँसे च्वनाच्वंगु खः । भारतं थ्व स्वयां न्ह्यः जारी याःगु नक्साय् काली खुसि क्यनातःसां उकियात भारतया भूभागय् लाकातःगु खः । भारतं जारी याःगु न्हूगु नक्सा कथं नेपाःया ३७२ वर्गकिलोमिटर भूभाग भारतं अतिक्रमण यानातःगु दु । उगु हे भूभाग अतिक्रमण यायेगु निंतिं हे काली खुसि भारतया भूभागय् लाकूगु खँ धाःगु दु ।