बुद्ध विहारयात मनपाया थप ग्वाहालि

येँ – येँ मनपा वडा नं. २८ य् निर्माण जुयाच्वंगु बुद्ध विहारयात येँ मनपां थप ७० लाख तका दां लःल्हाःगु दु । म्हिगः बुद्ध विहारय् जूगु छगू ज्याझ्वःया दथुइ येँ मनपाया मेयर विद्यासुन्दर शाक्यं विहारया प्रमुख भिक्षु कोण्डन्य महास्थविरयात ७० लाख तकाया चेक लःल्हानादीगु खः ।

थ्व स्वयां न्ह्यः उगु विहार निर्माण यायेत येँ मनपां १ करोड तका ग्वाहालि बीधुंकूगु दु ।

म्हिगः जूगु चेक हस्तान्तरण ज्याझ्वलय् न्ववासें मेयर शाक्यं बौद्ध सम्बन्धी विहार निर्माण यायेगु लागिं येँ मनपां मेमेगु नं आपालं विहारयात ग्वाहालि याना वयाच्वनागु खँ कनादिल । बौद्ध विहार दयेकेगु ज्याय् मनपां येँ दुने जक मखु पिने जिल्लाय् समेत ग्वाहालि यानाच्वनागु खँ नं कनादिल ।

अथे हे उपमेयर हरिप्रभा खड्गी श्रेष्ठं येँया कला संस्ंकृति व भाषा संरक्षण यायेगु लागिं मनपां यक्व ज्या यानाच्वंगु खँ कसें आः थनया फुक्कं स्कुलय् १ निसें ८ तगिं तक नेपालभाषाया माध्यमं येँ देय्या म्हसीका बीगु सफू ब्वंकेत्यनागु जानकारी नं बियादिल ।

भिक्षु कोण्डन्य महास्थविरया सभापतित्वय् जूगु उगु ज्याझ्वलय् येँ मनपा सहरी योजना आयोगया दुजः इन्जिनीयर सजिव शाक्य व इन्जिनीयर मञ्जुश्री स्थापितं विहार निर्माणया लागिं जुयाच्वंगु ज्याखँ बारे स्लाइड प्रस्तुत यानादीगु खः ।

करिब ५ करोड तकाया लागतय् दयेकाच्वंगु थ्व विहार निर्माणया अन्तिम चरणयय् थ्यनाच्वंगु दु । मुक्कं नेवाः वास्तुकलां भय्बिउगु थ्व विहार निर्माण यायेत थीथी दातापिंसं नं ग्वाहालि याःगु दु ।

ज्याझ्वलय् भिक्षु महासंघया उपाध्यक्ष भिक्षु धर्ममूर्तिं महास्थविरं पुण्यानुमोदन यानाबिज्याःगु खः ।

सम्बन्धित बुखँ

LEAVE YOUR COMMENTS