थीथी आयोगय् सिफारिस पदाधिकारीपिं पाखें शपथ ग्रहण

येँ -अवैधानिक रुपं नियुक्त जूगु धासें प्रतिनिधि सभाया सभामुख अग्नि सापकोटां संसदीय सुनुवाइ हे मयासे लितछ्वपिं थीथी आयोगय् नियुक्त पदाधिकारीतय्सं शपथ ग्रहण याःगु दु । थौं सुथय् राष्ट्रपति भवन शीतल निवासय् अख्तियार दुरुपयोग आयोगया प्रमुख आयुक्तय् नियुक्त जूम्ह पुलांम्ह गृहसचिव प्रेम राई लिसें सकलें पदाधिकारीपिंसं शपथ ग्रहण यानादीगु खः ।

शपथ ग्रहण ज्याझ्वलय् राष्ट्रपति विद्यादेवी भण्डारी, प्रधानमत्री केपी शर्मा ओली, प्रधानन्यायाधीश चोलेन्द्र शम्शेर जबरा, राष्ट्रि«य सभाया अध्यक्ष गणेश तिमिल्सिनापिनि उपस्थिति दुगु खः । संवैधानिक निकायया प्रमुखपिंत प्रधानन्यायाधीश चोलेन्द्र शम्शेर जबरां व मेपिं दुजःपिंत सम्बन्धित निकायया प्रमुखपिंसं शपथ ग्रहण याकूगु खः ।

संवैधानिक परिषद्ं वंगु पुस ५ गते थुपिं पदाधिकारीत नियुक्तीया निंतिं नां सिफारिस याःगु खः । नां सिफारिस धुंकाः संसदीय समितिइ सुनुवाईया निंतिं प्रतिनिधि सभाय् नां छ्वःगु खःसां सभामुख अग्नि सापकोटां संसदय विघटन जुइधुंकूगु अवस्थाय् संसदीय सुनुवाइ जुइमफइगु व नां सिफारिस नं अवैधानिक रुपं जूगु धासें नां लितछ्वयाबिउगु खः ।

यदि संसदीय सुनुवाइ समितिं ४५ न्हुया दुने निर्णय मबिल धाःसा स्वतः नियुक्त जुइगु प्रावधान कथं ४५ न्हु पूवनेवं थौं पदाधिकारीपिंत शपथ ग्रहण याःगु खः ।

प्रधानमन्त्री ओलीं थः यःयःपिं नियुक्त यायेगु निंतिं संवैधानिक परिषद् सम्बन्धी ऐन हे अध्यादेश मार्फत संशोधन यानाः थुपिं पदाधिकारीतय् नां सिफारिस याःगु खः । परिषद्सम्बन्धी ऐन कथं न्हापा नियुक्ति सिफारिसया निंतिं परिषद्या सकलें दुजःपिं सहित बैठक च्वनेमाःगु प्रावधान दुगु खः, तर सभामुख सापकोटा व प्रमुख प्रतिपक्षी नेता शेरबहादुर देउवा बैठक उपस्थित मजुइगु जुइवं प्रम ओलीं अध्यादेश मार्फत परिषद्या बहुमत सदस्यया उपस्थितिइ बैठक च्वनाः निर्णय यायेफइगु कथं ऐनय् संशोधन याःगु खः ।

शपथ ग्रहणयात कयाः संसदीय सुनुवाई समितिया अध्यक्ष जुयाच्वनादीम्ह लक्ष्मणलाल कर्णं विरोध यानादीगु दु । वय्कलं संसद् हे विघटन जुइधुंकाः सिफारिसया निंतिं छ्वयाहःगुलिं सुनुवाई जुइमफुगु धसों सुनुवाई हे मजुइकं शपथ ग्रहण यायेदइमखु धयादीगु दु । संविधान विज्ञतय्सं नं यदि सुनुवाई सुरु जुइधुंकाः ४५ न्हुया दुने निर्णय मबिउगु खःसा जक स्वतः नियुक्त यायेदइ, तर सुनुवाई सुरु हे मजुइकं, सुनुवाई समितिइ नां हे मथ्यंकं ४५ न्हुया दुने नियुक्त जुइगु प्रावधान लागू जुइमखु धाःगु दु ।

सम्बन्धित बुखँ

LEAVE YOUR COMMENTS