पर्यटन मजदूर आन्दोलित

येँ (नेपालभाषा टाइम्स) – कोरोनां पर्यटन व्यवसाय ठप्प जुइवं थःपिनिगु जीवकाय् लिच्वः लाःगु धासें पर्यटन मजदूरत आन्दोलित जूगु दु। सरकारं महामारीया इलय् पर्यटन मजदुरतय् सुरक्षाया लागिं छुं हे ज्या मयाः धासें म्हिगः फिब्व ख्यलंनिसें पर्यटन बोर्ड तक जुलुस पिकाःगु खः । जुलुसया झ्वलय् उमिसं पर्यटन मन्त्रीं ज्या यायेमफुगु धासें राजीनामा बीमाःगु माग नं याःगु खः । पर्यटन मजदुर संघर्ष समिति येँया ग्वसालय् जूगु विरोध ज्याझ्वलय् मजदुरतय्सं ‘नये मखनाः सीगु स्वयां ल्वचं कयाः सीसा अःपुक आत्मायात शान्ति दइ, गुम्हेस्यां पर्यटन मजदुरया भविष्ययात चिउताः तइ मखु, उमिसं टुरिजम त्वःती’ धइगु प्ले कार्ड नं ब्वया वःगु खः । प्रदर्शनकारीतय्सं पर्यटन मजदुरया मर्का मथूम्ह पर्यटनमन्त्री योगेश भट्टराईया राजीनामा फ्वंगु दु ।