स्कुल चायेकूसां पढाइ भद्रगोल

कोर्स सिधयेके फइगु खँय् शिक्षकतय्त शंका

येँ (नेपालाभाषा टाइम्स) – कोरानो संक्रमणं यानाः बन्द जुयाच्वंगु स्कुलत चायेकेगु धकाः येँ महानगरपालिकां निर्णय याःसां नं विद्यार्थीतय्सं ब्वनेमाःगु कोर्स पूवंके फइ वा मफइगु धइगु न्ह्यसः ब्वलंगु दु ।

निजी स्कुलतय्सं वंगु असारं निसें हे विद्यार्थीतय्त अनलाइन क्लास कयाच्वंगु खःसां सार्वजनिक स्कुलय् धाःसा अनलाइन क्लास कायेगु ज्या मजूगुलिं आः समस्या ब्वलने फइगु खँ सम्बन्धित शिक्षकतय्सं धाःगु दु। उकथं हे छुं छुं निजी स्कुलतय्सं अनलाइन क्लासया नापनापं वंगु निला न्ह्यवंनिसें स्कुल चायेकाः विद्यार्थीतय्त प्रत्यक्ष क्लास कायेगु यानाच्वंगु दुसा गुलिखे स्कुलं धाःसा उकथं क्लास मकाःगुलिं यानाः थुगुसी परीक्षा बीपिं विद्यार्थी गुकथं परीक्षा कायेगु धइगु न्ह्यसः ब्वलनाच्वंगु खँ छगू स्कुलया नां कने मयःम्ह प्रिसिपलं ‘नेपालभाषा टाइम्स’ यात कनादीगु दु । वय्कःया कथं थःगु स्कुलय् वंगु निला न्ह्यवंनिसें विद्यार्थीयात प्रत्यक्ष रुपं स्कुलय् उपस्थित याकाः क्लास न्ह्याकूगु जूगुलिं कोर्सया ८० निसें ९० प्रतिशत ब्वंकेगु ज्या क्वचाइगु जुयाः समस्या मदुगु धासें तर मेगु गुलिखे स्कुलय् अनलाइन क्लास मदुगुलिं निजी क्षेत्रया स्कुलयात समस्या जुयाच्वंगु खँ कनादीगु दु ।

वय्कःया कथं सरकारं थुगुसीया एसइई वइगु जेठ महिनाय् जक जुइ फइगु खँ कनादिसें गुलिखे स्कुलय् क्लास मजूगु कारणं यानाः विद्यार्थीतय्त समस्या जुइफइगु खँ कनादीगु दु। वय्कलं धयादी, ‘अनलाइन क्लास कायेधाःगु स्कुलं नं क्लास काये फयाच्वंगु मदु, मेखे विद्यार्थीयाके अनलाइनया पहुँच मदुगुलिं यानाः नं समस्या ब्वलनेफु ।’

येँ महानगरपालिकां थ्वहे वइगु माघ १८ गते निसें स्वनिगःया सार्वजनिक व निजी स्कुल चायेकेगु निर्णय याःगु खः । तर महानगरपालिकां निर्णय याःसां नं गुलिखे स्कुल बन्द जुइगु अवस्था नं वयाच्वंगु खँ सूत्रं धाःगु दु। स्वनिगलय् न्हापा थिकयेक फी कायेगु यानाच्वंगु स्कुलया विद्यार्थीयात आः वयाः म्हो जक फि पुलेमाःगु स्कुलय् भर्ना यायेगु क्रम नं अप्वया वनाच्वंगु दु । फी थिकयेगु स्कुलं साउन महिनां निसें हे फी कायेगु क्रम शुरु यायेवं अभिभावकतय्सं अज्याःगु स्कुलं थः मस्तय्त लिकयाः मेथाय् तयेगु याना हःगु नं खने दया वःगु दु ।

उकथं हे प्याब्सनया दुजः पुष्प श्रेष्ठं स्कुलया कोर्स आः असारय् वनाः जक पूवंके फइगु बिचाः तयादीगु दु। वय्कलं नं सरकारं एसइईया ई ठप याःगुलिं यानाः न्हूगु सेसन असारय् जक शुरु जुइगु खँ कनादीगु दु। न्हूगु सेसन लछि लिपा शुरु जुल धाःसा थुकिं ब्वनीपिं विद्यार्थीतय्त लिच्वः मलाइ ला धकाः न्यनागु न्ह्यसःया लिसः बिसें वय्कलं धयादी, ‘न्हूगु सेसन शुरु जुल धाःसा सार्वजनिक विदा कटौती यानाः जूसां मिले यायेगु जुइ ।’

सम्बन्धित बुखँ

LEAVE YOUR COMMENTS