
ख्वप – नेपाल मजदुर किसान पार्टी (नेमकिपा)या नायः नारायणमान बिजुक्छेँ रोहितं थःगु ८० दँ बुदिं वय्कः थम्हं हे च्वयादीगु ‘जेलका चिठ्ठीहरू’ नांया सफूयात कयाः तयार यानातःगु शोधग्रन्थ थम्हं हे विमोचन यानाः हनादिल । नेमकिपाया नायः बिजुक्छें च्वयादीगु ‘जेलका चिठ्ठीहरू’ नांया सफूयात कयाः शोध यानादीम्ह हरिसुन्दर बासीं ‘पत्र साहित्यमा रोहित’ नांया शोध ग्रन्थ तयार यानादीगु खः ।
बिजुक्छेँ नख्खु जेलय् च्वनादीगु इलय् थः जहान शोभा प्रधानयात च्वयादीगु नीछपु पौयात कयाः बासीं शोध यानादीगु खःसा उकियात सफूया आकार बियाः वंगु आइतवाः बिजुक्छें हे विमोचन यानादीगु खः । नेपाल क्रान्तिकारी सांस्कृतिक संघ केन्द्रीय समितिं बासीं स्नातोकोत्तर तहय् बुझे याःगु शोधयात सफूया आकार बियाः पिथंगु खः ।
सफू पितब्वज्या यासें नेमकिपा नायः बिजुक्छेँ थम्हं उगु इलय् च्वयागु पतिइ दुःख सुखया थीथी खँ दुथ्याकागु खःसां प्रेम भावनायात उजागर यायेगु स्वयां नं व्यावहारिक खँयात कुत्तुकुलाः क्यनेत स्वयागु धयादिल । लिसें वय्कलं ख्वपया चर्चित भक्तपुर काण्डया इलय् नख्खु जेलय् च्वनाः थम्हं उगु पौ च्वयागु लुमंकादिसें धयादिल, ‘पौ शोभाया नामय् च्वयागु खःसा सदां दुःख जक लुमंकाः च्वनेगु स्वयां नं थःगु ध्यानयात मेथाय् केन्द्रीत यायेकथं उगु पौ च्वयागु खः ।’
ज्याझ्वलय् सभापतिया थासं संघया केन्द्रीय नायः सुरेन्द्रराज गोसाईनं वैचारिक उर्जा व सैद्धान्तिक खुराकया निंतिं पत्र साहित्यं थौंया न्हू पुस्तायात आपालं ग्वाहालि याःगु खँ कनादिल ।
पितब्वज्या जूगु सफूया समीक्षा यासें जनलेखक संघ ख्वपया अध्यक्ष लक्ष्मणराज जोशीं कला, साहित्य, राष्ट्रिय व अन्तर्राष्ट्रिय विषयवस्तुयात दुवालाः थःगु जीवनया थीथी पक्षयात कयाः बिजुक्छें ‘जेलका चिठ्ठीहरू’ सफुतिइ आपालं व्याख्यात्मक व विश्लेषणात्मक खँ च्वयादीगु कनादिल ।
ज्याझ्वलय् युवा साहित्य गोष्ठिया निरज लवजु, कवि हरिहर तिमिल्सिना, शोधकर्ता रविन्द्र न्हय्म्हाफुकी व सफूया च्वमि बासीं नं थःथःगु नुगःखँ तयादीगु खः ।
LEAVE YOUR COMMENTS