अस्ट्रेलियाय् फाइजरयात स्वीकृति

एजेन्सी – अस्ट्रेलियाया वासः नियामक निकायं नं अमेरिकाया फाइजर कम्पनीं विकास याःगु कोरोनाभाइरस विरुद्धया खोपयात अनुमति बिउगु दु। प्रधानमन्त्री स्कट मरिसनं सोमवाः फाइजरया खोप स्वीकृति जूगु घोषणा यासें वइगु फेब्रुअरीया अन्त निसें खोप बीगु सुरु जुइगु खँ धयादीगु दु । अस्ट्रेलियाय् थेराप्युटिक गुड्स एड्मिनिस्ट्रेसन (टिजिए)पाखें स्वीकृत कायेत ताःलाःगु कोरोनाविरुद्धया खोपय् फाइजर कम्पनीया खोप हे दकलय् न्हापांगु खः ।

प्रधानमन्त्री मरिसनं पत्रकार सम्मेलनय् न्ववासें अस्ट्रेलियाया नियामक निकायं विस्तृत अध्ययन यायेधुंकाः जक फाइजरया खोपयात स्वीकृति बियागु खँ धयादीगु दु। वय्कलं थ्व खोप अस्थाइ वा आकस्मिक कथं जक मखसे पूवंक खोपया रुपय् हे अस्ट्रेलियाय् स्वीकृति बियागु खँ धयादीगु दु। अस्ट्रेलियां थ्व स्वयां न्ह्यव हे फाइजरयात छगू करोड खोपया निंतिं अनुबन्ध यानातयेधुंकूगु दु। अस्ट्रेलियाया नं न्हापांगु चरणया खोप अभियानया इलय् बुारबरीपिंत हे जक खोप बी ।

प्रधानमन्त्री मरिसनं वइगु अक्टोवरतकया दुने खोप अभियान पूवंक क्वचाइगु जानकारी नं बियादगिु दु। अस्ट्रेलियां अक्सफोर्ड-अस्ट्राजेनिकां विकास याःगु खोपया न्यागू करोड मात्रया निंतिं आदेश बीधुंकूगु दु। थ्व खोप फुक्कं अस्ट्रेलियाय् हे विकास याइगु खँ धाःगु दु। अक्सफोर्ड एस्ट्रोजेनिकायं विकास याःगु खापया निंतिं सरकारं आदेश बीधुंकूगु दु। थ्व खोप अप्वः धयाथें अस्ट्रेलियाय् हे दयकीगु जूसां अस्ट्रेलियाया नियामक निकायं धाःसा थ्व खोपयात स्वीकृति बिउगु मदुनि ।