नेपाःयात युक्रेन युद्धया पाठ

येँ – थौंकन्हय् न्ह्यानाच्वंगु रुस–युक्रेन युद्धपाखें नेपाः थेंज्याःगु ततःधंगु जःलाखःला दुगु चीधंगु देसं शिक्षा कायेमाःगु खँ रुस व युक्रेन निगुलिं देय्या लागिं पुलांम्ह नेपाली राजदूत हिरण्यलाल श्रेष्ठं धयादीगु दु ।

रुस थेंज्याःगु तःधंगु देय्या जःलाखःला जुयाः नं रुसयात वास्ता मयासे न्हय्गू समुद्र पारी च्वंगु अमेरिकायात पास्याः वंगु कारणं यानाः हे थौं युक्रेन युद्धया ग्वःफसय् लायेमाःगु खँ भाजु श्रेष्ठं कनादिल ।

रुस व युक्रेनया राजदूत जुयाच्वंगु इलय् निगुलिं देय्या स्थितियात सतिक च्वनाः अवलोकन यानादीम्ह भाजु श्रेष्ठं ‘नेपालभाषा टाइम्स’ लिसे खँ ल्हासें आःया अवस्था बारे कनादिल –
युक्रेनया सवालय् रुसया चिउताः निता स्वता खँय् दु । छगू ला युक्रेनं थःगु देशय् च्वंपिं रुसी भाषीतय्त तसकं हेपे याइगु । थुकिं यानाः युक्रेनय् जातीय एकता मदु । युक्रेनं हेपे याइगु कारणं उगु देय्या रुसी भाषीतय्सं न्ह्याबलें रुसया ख्वाः स्वयाच्वनी । छुं दँ न्ह्यः तिनि युक्रेनया रुसी भाषी राज्य क्रिमिया अनं कुचा जुयाः रुसय् स्वाः वंगु खः ।

अथे हे थौंकन्हय् नाटो संगठन युक्रेन जुयाः पूर्वी युरोपपाखे दुहां वयेत स्वयाच्वंगु दु । यदि युक्रेनं नाटोया सदस्यता काल धाःसा अन नं अमेरिकी सेना च्वं वइ व थुकिं यानाः रुसया सुरक्षायात ख्याच्वः जुइ । उकिं उकियात पनेगु लागिं नं रुसं युक्रेनय् आक्रमण मयासें मगाःगु अवस्था दु । यदि अमेरिकी सेना युक्रेन दुहां वल धाःसा थ्वं रुसयात नं कुचा यायेत स्वयेफु । अय् जूगुलिं थ्व युद्धय् युक्रेनया भूमि प्रयोग जूगु खःसां थ्व वास्तवय् रुस व नाटो दथुया युद्ध खः ।

सोभियत संघ विघटन जुयाः बने जूगु १४ गू अलग अलग देश मध्ये १३ गू देशया दथुइ अझ नं सुरक्षा सम्बन्धी सन्धी जुयाच्वंगु दु । उगु सन्धीइ दुमथ्याःम्ह युक्रेन छगू हे जक खः । उकिं युक्रेनय् जूगु थ्व आक्रमणयात युरोप व अमेरिकां विरोध याःसां वहे क्षेत्रया देय्तय्सं धाःसा ‘मौन समर्थन’ यानाच्वंगु दु ।

रुसं आक्रमण यायेधुंकाः अमेरिक न्ह्याः मवःगु कारण छु धाःसां आः रुसया पक्षय् चीन नं दु । अमेरिकां चीन व रुस निगुलिं देय्लिसे छक्वलं ल्वाये फइ मखु । अमेरिका व युरोपं रुस विरुद्ध आर्थिक नाकाबन्द ी याःसां रुसयात माःगु फुक्क चीनं पुरे यानाच्वंगु दु, उकिं रुसयात छुं लिच्वः लाइगु खनेदु ।

युक्रेनया थ्व अवस्थापाखें नेपालं नं शिक्षा कायेमाः । यदि थः जःलाःखःला जुयाच्वंगु तःधंगु देय्तय्त वास्ता मयासे न्हय्गू समुद्र पारीया देय्लिसे पाचिउँ वन धाःसा लिच्वः छु जुइ धइगु थुकिं क्यना बिउगु दु । थ्व नेपाःया लागिं नं छगू शिक्षा खः ।

सम्बन्धित बुखँ

LEAVE YOUR COMMENTS