ने. सं. ११४४ कछलागा षष्ठी -

वइगु दँय् यायेमाःगु विकासया ज्या म्हो हे जक दइ

किपू नगरपालिकाया १ नं वडायात म्हसीकेमाल धाःसा गुकथं म्हसीके फइ ?
— थ्व किपूया डाँडाय् लाःगु वडा खः । थ्व वडाय् किपूया आराध्य द्यः बाघभैरव, किपूया लाय्कू लानाच्वंगु दु । कलंकी मालपोटनिसें बाघभैरव, थांबहाः लाय्कूतक लाःगु छगू ताःहाकःगु वडा नं खः ।

वडाय् वयेधुंकाः विकास निर्माणया ज्या गुकथं न्ह्यानाच्वंगु दु ?
— धायेमाल धाःसा यक्व ज्या जूगु दु । जिपिं वडाय् वयेधुंकाः आपालं ज्या जूगु महसुस यानागु दु । १ वडाय् जुयाच्वंगु विकास निर्माणया ज्याया ल्याखं स्वयेगु खःसा आः वइगु दँय् यायेमाःगु ज्या हे कम जक दइ धइगु महसुस यानाच्वना, उलि ज्या सिधयेधुंकूगु दु ।

सम्पदा पुनःनिर्माण, मर्मत सम्भार यायेगु ज्या गुलितक जूगु दु ?
सम्पदाया ल्याखं धायेगु खत धाःसा थ्व १ वडाय् लाःगु बाघभैरव क्षेत्र । किपूया हे प्रमुख धरोहरमध्ये छगू खः । थ्व थाय्यात व्यवस्थित यायेगु नापं थज्याःगु सम्पदा संरक्षण व जगेर्ना यायेगु ज्या जुया वयाच्वंगु दु । थ्व वडा दुनेया न्यागू खुगू फल्चा, सतः दयेधुंगु दु । वडा दुने दुगु सम्पदायात फक्व व्यवस्थित यायेगु ल्याखं ज्या जुयाच्वंगु दु । छता खँ छु धाःसा किपुलिइ वइपिं गुलि नं स्वदेशी व विदेशी पर्यटक दु इमिसं लाय्कू (दरवार) या बारे न्यनेकने यानाच्वंगु दु । उकिं आः किपू लाय्कूयात व्यवस्थित यायेत स्वयाच्वनागु दु । किपू दरवारयात व्यवस्थित यायेगु निंति धकाः हे करिब झिंनिसलं हस्ताक्षर यानाः अभियान न्ह्याका वयाच्वंगु दु । वडा दुने लाःगु किपूया लाय्कू दयेकेत जिगु हे पहलय् कुतः जुयाच्वंगु दु । थुकियात अतिकं महत्व बिया कयाच्वनागु दु ।

कोरोनां वडाया विकासया ज्याय् गुलितक प्रभाव लाकूगु दु ? याये धकाः स्वयां नं याये मफुगु छुं दु ला ?
—कोरोनां यानाः भचा भचा जक मखु यक्व हे प्रभाव लाकूगु ला दुगु हे जुल । कोरोनाया कारणं वडाय् जक मखु किपू देशय् हे लाकूगु प्रभावयात कयाः छेँय् छेँय् वनाः वडावासीयात सुसूचित यायेगु, पिने जिल्लां वःपिं विदेशं वःपिंत नं परीक्षण यायेगुनिसें कयाः वडापतिकं सुचुकुचु यायेगु, मू मू सतकय् जक मखु, गल्ली गल्लीइ दुने दुने थ्यंक वनाः नं वासः छ्वाकेगु यानागु जुल ।
कोरोनां यानाः ज्या मजूगु धाये वा लिहां वंगु ज्या धायेमाल धाःसा स्वीमिंग पुलनिसें सीतापाइलातकया सतक गुगु दु व कालोपत्र (पीच) यायेधकाः धयागु खः, व याये फयाच्वंगु मदुनि । कोरोनाया कारणं अवरोध थें जुयाच्वंगु उगु लागाया सतक पीच यायेगु ज्या वइगु छुं दिंया दुने हे न्ह्याका वनेगु जुइ ।
जि किपू नगरपालिकाया स्वास्थ्य तथा फोहर मैला व्यवस्थापनया संयोजक नं जूगु ल्याखं जिं फक्व योजना दयेकाः ज्या यानाथें ताः । आः धाःसा भचा हलुका जूगु महसुस यानाच्वना ।

वडावासीया अप्वः गुनासो छु दु ?
— जिपिं वयेधुंकाः वडावासीया अप्वः थें वइगु गुनासो धइगु त्वनेगु लःया समस्या सम्बन्धी हे खः । त्वनेगु लःया व्यवस्थापन व्यवस्थित मजू धइगु हे वडावासीया गुनासो खः । तर आः वयाः थ्व समस्या नं अपाय्सकं मदुगु थें जिं तायेका । जिपिं जनप्रतिनिधि जुयाः वयेधुंकाः लँ दयेकेगु, थाय्थासय् पःखाः दनेगु ज्या नं जूगु दु । गुकियात वडावासीतय्सं बांलाःगु ज्या धकाः च्वछाःगु जिं खना । धाइपिंसं ला न्ह्यागु नं धाइ, धया नं च्वंगु दु । तर सामाजिक दृष्टिकोणं स्वयेगु खःसा यक्वसिनं ज्या जूगु धकाः हे धयाच्वंगुलिं जिमिसं नं थःगु दायित्व निर्वाह यायेत सफल जूगु हे तायेका ।

वडावासीया समस्या संबोधन यायेत गुलितक सफल जूगु तायेकादिया ?
— जिपिं जनप्रतिनिधि जुयागु धइगु हे वडा व वडावासीया निंतिं खः । इमिगु समस्या समाधान यायेगु निंतिं हे खत । सर्वसाधारणया समस्या समाधानया निंतिं छुं याये धकाः हे जिपिं वयागु खः । छुं पहल याये धकाः हे वयागु खः । वडावासीया समस्यायात व्यवस्थित रुपं समाधान यायेगु निंतिं आतक जिपिं लगे जुयागु ल्याखं यक्व हे यानागु दु थें ताः । जिमिसं वडावासीया समस्यायात संबोधन यायेगु ल्याखं त्वनेगु लः, धः, लँ, मत आदि दक्वयात व्यवस्थित यानागु दु थें जिं तायेका ।

न्ह्यब्वःम्ह – उदेन न्हूसाय्मि